Read Uzbek Muqaddas Kitob Hikmatlar 22 Bible Online

Hikmatlar 22 - Uzbek Muqaddas Kitob bible

Hikmatlar 22

¹Yaxshi nom — eng katta boylikdan ortiq, marhamatga sazovor boʻlish esa kumushu oltindan ham yaxshi.

²Boy bilan kambagʻalning bir oʻxshashligi bor, ikkovini ham Egamiz yaratgan.

³Es — hushli odam xavf — xatarni koʻrib yashirinadi, sodda[74] esa toʻxtamasdan boraveradi, shuning uchun qiynaladi.

⁴Kamtarlik va Egamizdan qoʻrqish[75] boylik, hurmat va hayot keltiradi.

⁵Egrining yoʻlida tikanzor va tuzoqlar bor, oʻz jonini asragan undan uzoqlashadi.

⁶Bolani toʻgʻri yoʻlga solib tarbiyala, shunda qariganda ham yoʻlidan adashmaydi.

⁷Boylar kambagʻallar ustidan hukmronlik qiladi, qarzdor qarz berganning qulidir.

⁸Fosiqlikni ekkan tashvish yigʻadi, jahl qamchisi sinadi.

⁹Saxiy baraka topadi, chunki oʻz nonini kambagʻallar bilan baham koʻradi.

¹⁰Mazax qiluvchini oradan quv! Shunda gʻavgʻo ketadi, janjalu haqorat ham barham topadi.

¹¹Pokdillikni sevib, xushmuomala boʻlganga shoh doʻst boʻladi.

¹²Egamiz ilm — ma’rifatli insonni asraydi, U xoinning soʻzlarini puchga chiqaradi.

¹³Dangasa: “Tashqarida sher bor, koʻchada meni oʻldiradi”, — deydi.

¹⁴Buzuq ayolning ogʻzi tubsiz chohdir, Egamizning gʻazabiga uchraganlar unga tushadi.

¹⁵Aqlsizlik bolaning diliga oʻrnashgan, uning bu aqlsizligini kaltak haydab chiqaradi.

¹⁶Boy boʻlaman deb qashshoqni ezgan ham, boyga sovgʻa qilgan ham kambagʻallashadi.

¹⁷Donolarning soʻzlariga quloq tut, qalbingni bilimimga och.

¹⁸Chunki bu soʻzlarni qalbingda saqlasang, diling yashnaydi, ular doim tilingda tayyor boʻlsin.

¹⁹Egamizga umid bogʻlagin deb bugun shularni oʻrgatyapman.

²⁰Senga bilim va maslahat bilan oʻttizta nasihat yozib bermaganmidim?!

²¹Bu haqiqat soʻzlarini oʻrganib, seni yuborganlarga aytib berishing uchun edi.

²²Kambagʻalni kambagʻalligi uchun talama, baxtsizni darvoza oldida hukm qilganda qiynama.

²³Chunki Egamiz ularni himoya qilib, zolimlariga Oʻzi zulm qiladi.

²⁴Urishqoq bilan doʻstlashma, badjahl bilan yurma.

²⁵Boʻlmasa sen ham ularning yoʻliga tushib qolasan, joningni tuzoqqa ilintirasan.

²⁶Begona bilan qoʻl tashlashma, oʻzganing qarziga kafillik berma[76].

²⁷Agar oʻshaning qarzini toʻlashga hech narsang boʻlmasa, hatto, tagingdagi toʻshagingdan ham ayrilib qolasan.

²⁸Ota — bobolaring qoʻygan qadimiy chegaralarni buzma[77].

²⁹Oʻz ishiga mohir ustani koʻrganmisan? U oddiy odamlarga emas, shohga xizmat qiladi.