Read Uzbek Muqaddas Kitob Hikmatlar 23 Bible Online

Hikmatlar 23 - Uzbek Muqaddas Kitob bible

Hikmatlar 23

¹Hokim bilan ovqatlanishga oʻtirganda, oldingga qoʻyilgan narsalarga nazar sol.

²Agar ishtahang katta boʻlsa, boʻgʻzingga pichoq tiralganday, oʻzingni nazorat qil.

³Uning ne’matlarini koʻngling tusamasin, chunki bu aldamchi taomdir.

⁴Boy boʻlay deb koʻp harakat qilma, fahmu farosat bilan bu fikringdan voz kech.

⁵Boylik koʻz ochib yumguncha yoʻq boʻladi, qanot qoqib burgutday osmonga uchib ketadi.

⁶Xasisning ovqatidan yema, uning ne’matlarini koʻngling tusamasin.

⁷Chunki u koʻnglida oʻzining foydasini hisoblaydi[78], “Yegin, ichgin”, — deydi — yu, koʻngli sen bilan emas.

⁸Yegan luqmangni qayt qilasan, shirin soʻzlaring havoga uchib ketadi.

⁹Ahmoqqa gap gapirma, u hikmatli soʻzlaringni rad etadi.

¹⁰Qadimiy chegaralarni buzma[79], yetimlarning dalasini tortib olma.

¹¹Chunki ularning Himoyachisi qudratli, U yetimlarning tarafini oladi.

¹²Yuragingni nasihatga, quloqlaringni esa idrokka och.

¹³Boladan tanbehni ayama, chunki tayoq bilan ursang oʻlmaydi.

¹⁴Tayoq bilan urib jazolasang, jonini doʻzaxdan[80] saqlaysan.

¹⁵Oʻgʻlim[81], qalbingda donolik boʻlsa, yuragim quvonadi.

¹⁶Tilingdan toʻgʻri soʻz chiqsa, koʻnglim ham shodlanadi.

¹⁷Gunohkorlarga havas qilma, doimo Egamizdan qoʻrqib[82] yur.

¹⁸Chunki albatta kelajak bor, umiding roʻyobga chiqadi.

¹⁹Oʻgʻlim, tinglab dono boʻl, yuragingni toʻgʻri yoʻlga sol.

²⁰Mayxoʻr va ochkoʻzlik bilan goʻsht yeydiganlar orasida boʻlma.

²¹Chunki mayxoʻr va ochkoʻz qashshoq boʻladi, uyquchilik juldur kiyim kiydiradi.

²²Seni dunyoga keltirgan otangga quloq sol, onang qariganda uni xor qilma.

²³Haqiqatni sotib ol, donolik, yoʻl — yoʻriq, idrok ham ol, ularni sotma.

²⁴Solih otasining boshini koʻkka yetkazadi, dono farzand[83] uni xursand qiladi.

²⁵Ota — onang sendan xursand boʻlsin, senga hayot bergan onang shod boʻlsin.

²⁶Oʻgʻlim, menga qalbingni och, koʻzlaring ishlarimni kuzatsin.

²⁷Chunki buzuq xotin — tubsiz choh, zinokor xotin tor quduqdir.

²⁸U qaroqchi kabi poylab turadi, odamlar orasida vafosizlikni orttiradi.

²⁹Qaygʻu kimda, kim gʻam — tashvish tortadi? Kim janjal qiladi, shikoyat qilgan kim? Kim sababsiz yaralanadi? Kimning koʻzlari qip — qizil?

³⁰Sharob ichishga berilganlar, xushboʻy mayni totib koʻrishga koʻp borganlar.

³¹Sharobning qizilligiga, qadahda choʻgʻday tovlanishiga, tekis quyilishiga qarama.

³²Oxirida u ilon kabi chaqadi, qora ilonday zahar sochadi.

³³Koʻzlaring gʻalati narsalarni koʻradi, yuragingda egri fikrlar boʻladi.

³⁴Koʻpirgan dengiz oʻrtasida yotganday, toʻlqinlarda chayqalgan kemada uxlaganday boʻlasan.

³⁵“Meni urdilar, ogʻrimadi, kaltakladilar, lekin bilmadim. Qachon uygʻonaman? Yana bir ichay”, — deysan.