Read Uzbek Muqaddas Kitob Hikmatlar 24 Bible Online

Hikmatlar 24 - Uzbek Muqaddas Kitob bible

Hikmatlar 24

¹Fosiqlarga havas qilma, ular bilan birga boʻlishga intilma.

²Chunki ular zoʻravonlikni niyat qiladi, tillari yomonlikni gapiradi.

³Uy donolik bilan quriladi, idrok bilan mustahkam boʻladi.

⁴Xonalar esa bilim bilan turli qimmatbaho, qimmatli boylikka toʻladi.

⁵Dono sipohlar kuchli sipohlardan[84], ilm — ma’rifatlilar esa kuchi borlardan qudratliroqdir.

⁶Yaxshi odam yoʻl — yoʻriq bilan urushga boradi, maslahatchilar koʻpligi tufayli gʻalaba qiladi.

⁷Ahmoq donolikka yetishmaydi, hukmda ogʻzini ocha olmaydi.

⁸Yomon niyat qiluvchining nomi shakkokdir.

⁹Ahmoqlik bilan tuzilgan reja gunohdir, mazaxchidan odamlar jirkanadi.

¹⁰Tashvishli kunda ojiz boʻlganning kuchi kamdir.

¹¹Oʻlimga mahkum boʻlganlarni, dorga olib ketilayotganlarni qutqar.

¹²“Bilmayman”, — desang ham, yurakni sinaydigan Xudo koʻrmaydimi, jonni asraydigan buni bilmaydimi? Hammaga ularning ishiga yarasha qaytarmaydimi?

¹³Oʻgʻlim[85], asal yeb koʻrgin, u yaxshi, asalari mumi ogʻzingga shirindir.

¹⁴Donolik joningga asaldaydir, unga erishsang kelajagingni topasan, umiding roʻyobga chiqadi.

¹⁵Ey fosiq, solihning uyiga pistirma qurma, uy — joyiga tegma.

¹⁶Solih yetti marta yiqilsa ham turib ketaveradi, fosiq esa halokatga uchraydi.

¹⁷Dushmaning yiqilganda sevinma, qoqilgani uchun yuraging quvonmasin.

¹⁸Boʻlmasa Egamiz buni koʻrib yoqtirmay, gʻazabini undan oʻgiradi.

¹⁹Fosiqlardan jahling chiqmasin, yomonlarga havas qilma.

²⁰Chunki yomonlarning kelajagi yoʻq, fosiqlarning chirogʻi oʻchib qoladi.

²¹Ey oʻgʻlim, Egamizdan ham, shohdan ham qoʻrq, ularga qarshi bosh koʻtarma[86].

²²Chunki ulardan kulfat kutilmaganda keladi, ikkovidan keladigan halokatni kim biladi?!

²³Quyidagi soʻzlar ham donolardan. Hukmda tarafkashlik qilish yaxshi emas.

²⁴Fosiqqa “solihsan” deganni el la’natlaydi, xalqlar undan nafratlanadi.

²⁵Unga tanbeh berganlardan xursand boʻladi, ular qut — baraka topadilar.

²⁶Toʻgʻri javob beradiganlarni hamma sevadi.

²⁷Tashqaridagi yumushingni bajar, daladagi barcha ishlaringni tartibga sol, keyin uyingni qurgin.

²⁸Sababsiz oʻzgaga qarshi guvohlik berma, tiling bilan aldama.

²⁹“Menga nima qilgan boʻlsa, men ham shunday qilaman, qilmishiga yarasha qaytaraman”, dema.

³⁰Men dangasaning dalasidan, nodonning uzumzori yonidan oʻtdim.

³¹Ana, hamma yoq tikanzor, hamma yerda qichitqi oʻt, tosh devor ham qulab, yer bilan bitta boʻlib yotibdi.

³²Qarab, oʻylab koʻrdim, uni koʻrib saboq oldim.

³³“Bir oz uxlay, bir mizgʻib olay, yonboshlab birpas dam olay”, — deydi.

³⁴Shuning uchun qashshoqlik yoʻltoʻsarday, muhtojlik esa qaroqchiday ustiga keladi.