Read Uzbek Muqaddas Kitob Hikmatlar 25 Bible Online

Hikmatlar 25 - Uzbek Muqaddas Kitob bible

Hikmatlar 25

¹Quyidagilar ham Sulaymonning hikmatlaridir. Bu hikmatlar Yahudo shohi Hizqiyoning[87] odamlari tomonidan yozib olingan.

²Ishlarni sirli qilish — Xudoning shuhrati[88], ishlarni tekshirib bilish esa shoh sharafidir.

³Osmon baland, dengiz chuqur, shohning yuragi ham shunday, uni tushunish qiyin.

⁴Kumushdan chiqindini olib tashla, oʻshanda undan yaxshi idish yasaladi.

⁵Fosiqni shoh oldidan chiqarib tashla, shunda shohning taxti haqiqat bilan mustahkam boʻladi.

⁶Shohning oldida oʻzingni yuqori qoʻyma, ulugʻ odamlar turganda toʻrga chiqma.

⁷Chunki oʻzing koʻrib turgan asilzodalar oldida birov seni poygakka tushirgandan koʻra, “Toʻrga oʻting” degani yaxshiroq.

⁸Shoshilib arz qilma, oxirida qoʻshnilarning oldida uyalib qolsang nima boʻladi?

⁹Qoʻshningning oʻzi bilan gaplash, sirni boshqalarga ochma.

¹⁰Boʻlmasa, eshitganlar seni uyatga qoʻyadi, noming bir umrga yomon boʻladi.

¹¹Oʻz oʻrnida aytilgan soʻz tilla uzukka qoʻyilgan yoqut koʻzdaydir.

¹²Dononing tanbehi tinglagan quloqqa tilla sirgʻa va oltin bezakdaydir.

¹³Sadoqatli xabarchi uni yuborganlarga jazirama oʻrim paytidagi salqin suvdaydir, xoʻjayinining qalbini sevintiradi.

¹⁴Qilmagan sovgʻasi bilan maqtanadigan odam yomgʻirsiz bulut va shamol kabidir.

¹⁵Sabr — toqat bilan gapirilsa amaldor ham koʻnadi, muloyim soʻz toshni ham sindiradi.

¹⁶Asal topsang, yetarlicha yegin, ortiqchasi qayt qildiradi.

¹⁷Qoʻshningnikiga hadeb kiraverma, boʻlmasa sendan bezib, yomon koʻrib qoladi.

¹⁸Oʻzgaga qarshi soxta guvohlik bergan odam bolta, qilich, oʻtkir oʻqqa oʻxshaydi.

¹⁹Tashvishli kunda vafosizga suyanish singan tish va choʻloq oyoqqa ishonish kabidir.

²⁰Gʻamgin odam oldida qoʻshiq aytish ayozda ust — boshini yechib tashlaganday, jarohatga sirka surtish kabidir.

²¹Dushmaning och boʻlsa, ovqat ber, chanqagan boʻlsa, suv ichir.

²²Shunda uning boshiga yonayotgan choʻgʻ yiqqanday boʻlasan, Egamiz esa seni taqdirlaydi.

²³Shimoldan esadigan shamol jala, gʻiybat esa gʻazab keltiradi.

²⁴Urishqoq xotin bilan keng uyda yashagandan koʻra, loy tomning bir chetida yashagan yaxshiroq.

²⁵Uzoq yurtdan kelgan xushxabar charchagan odamga sovuq suv kabidir.

²⁶Fosiqqa bosh eggan solih loyqalangan buloq va buzilgan quduqdaydir.

²⁷Koʻp asal yeyish yaxshi emas, izzattalab boʻlish ham hurmat keltirmaydi.

²⁸Oʻzini tuta olmaydigan odam devorsiz vayrona shahar kabidir.