Read Uzbek Muqaddas Kitob Hikmatlar 26 Bible Online

Hikmatlar 26 - Uzbek Muqaddas Kitob bible

Hikmatlar 26

¹Aqlsizga izzat — hurmat koʻrsatish yozda yoqqan qor, yigʻim — terim paytidagi yomgʻir kabidir.

²Qushlar bekorga osmonga koʻtarilmaganday, sababsiz la’nat ham odamga tegmaydi.

³Otga — qamchi, eshakka — suvluq, aqlsizning orqasiga esa — tayoq.

⁴Nodonning nodon savollariga javob berma, boʻlmasa sen ham unga oʻxshab qolasan.

⁵Nodonning gaplari bemaʼniligini oshkor qil, tagʻin oʻzicha dono boʻlib ketmasin.

⁶Aqlsiz orqali xabar yuborgan odam oyogʻini kesib tashlaganday azob chekadi.

⁷Ahmoqning ogʻzidagi matal choʻloq oyoqdaydir.

⁸Aqlsizga izzat — hurmat koʻrsatish palaxmonga tosh bogʻlab qoʻyish kabidir.

⁹Nodonning tilidagi matal mastning qoʻlidagi tikandaydir.

¹⁰Ahmoqni va yoʻldan oʻtgan har bir mastni yollagan odam duch kelganni otadigan kamonkashga oʻxshaydi.

¹¹Oʻz qusugʻiga qaytib keladigan it kabi, nodon ham oʻz aqlsizligini takrorlaydi.

¹²Oʻzini dono deb oʻylaganni koʻrganmisan? Undan koʻra, aqlsizdan umid koʻproq.

¹³Dangasa: “Koʻchada sher bor, u ochiq maydonda yuribdi”, — deydi.

¹⁴Eshik oʻz oʻqida aylanadi, tanbal esa oʻz toʻshagida.

¹⁵Dangasa qoʻlini kosaga choʻzadi — yu, ogʻziga olib kelishga erinadi.

¹⁶Tanbal oʻz nazarida farosat bilan gapiradigan yetti kishidan ham donoroq.

¹⁷Boshqalarning janjaliga aralashgan daydi itning qulogʻidan choʻzgandaydir.

¹⁸Telba oʻt, nayza va oʻlim yogʻdiradi.

¹⁹Birovni aldab: “Faqat hazillashgan edim” degan ham shundaydir.

²⁰Oʻtin boʻlmasa, oʻt oʻchib qoladi, chaqimchi boʻlmasa, janjal toʻxtaydi.

²¹Koʻmir — choʻgʻ uchun, oʻtin — olov uchun, urishqoq esa janjal chiqarish uchundir.

²²Gʻiybatchining soʻzi shirin ovqat kabidir, odamning butun a’zoyi badaniga singib ketadi.

²³Shirin soʻzli niyati yomon odam kumush suvi yuritilgan[89] sopol idish kabidir.

²⁴Dushman tilida boshqacha soʻzlaydi, dilida esa aldashni niyat qiladi.

²⁵U yumshoq soʻzlaganda ishonma, chunki yuragi qabihlikka toʻla.

²⁶Nafrat yolgʻon bilan yashirilgan boʻlsa ham, yomonligi el — yurtga oshkor boʻladi.

²⁷Birovga chuqur qaziganning oʻzi unga tushadi, tosh dumalatganga esa oʻsha tosh qaytadi.

²⁸Yolgʻonchi til oʻzi yaralagan odamni yomon koʻradi, xushomadgoʻy halokat keltiradi.