Read Uzbek Muqaddas Kitob Hikmatlar 28 Bible Online

Hikmatlar 28 - Uzbek Muqaddas Kitob bible

Hikmatlar 28

¹Fosiqni hech kim quvmasa ham qochaveradi, solih esa sherday botir.

²Yurtda isyon boʻlganda boshliq koʻpayadi, ammo aql — idrokli rahnamo tufayli yurtda tinchlik barqaror boʻladi.

³Ojizlarni ezadigan kambagʻal ovqat qoldirmaydigan seldaydir.

⁴Qonunni tan olmaydiganlar fosiqlarni maqtaydi, qonunga amal qiladiganlar esa ular bilan kurashadi.

⁵Fosiq adolatni tushunmaydi, Egamizga intilgan esa hamma narsani tushunadi.

⁶Kambagʻal boʻlib toʻgʻri yurish boy boʻlib egri yurgandan yaxshiroq.

⁷Dono farzand[94] qonunga rioya qiladi, yaramasga ulfat boʻlgan esa otasini sharmanda qiladi.

⁸Sudxoʻr va ochkoʻz odam boylik yigʻadi, ammo boyligi qashshoqqa achinadiganga nasib etadi.

⁹Qonundan yuz oʻgirganning ibodati ham jirkanchlidir.

¹⁰Toʻgʻri odamni yomon yoʻlga boshlagan odam qazigan chuquriga oʻzi tushadi, pokdil esa yaxshilik topadi.

¹¹Boy oʻzining nazarida dono, aqlli kambagʻal esa oʻzini tekshiradi.

¹²Solih martabaga erishganda katta bayram, fosiq lavozimga kelsa odamlar yashirinadi.

¹³Oʻz gunohlarini yashirgan yutuqqa erishmaydi, ularni tan olib, voz kechgan marhamat topadi.

¹⁴Doim Xudodan qoʻrqqan[95] baxtlidir! Bagʻri tosh odam esa baloga uchraydi.

¹⁵Ojiz xalq ustidagi yovuz hukmdor irillayotgan sher va hujum qilayotgan ayiqdaydir.

¹⁶Aqlsiz hukmdor nihoyatda zolim boʻladi, adolatsiz foydadan nafratlanadigan uzoq yashaydi.

¹⁷Agar birov odam oʻldirgan boʻlsa, oʻlguncha qochib yursin, unga hech kim yordam bermasin.

¹⁸Toʻgʻri yuradigan najot topadi, egri yoʻldan yuradigan esa yiqiladi.

¹⁹Oʻz yeriga ishlov berganning noni moʻl boʻladi, orzu — xayollarga berilgan esa qashshoqlikka uchraydi.

²⁰Sodiq kishi koʻp baraka topadi, boyishga shoshilgan jazosiz qolmaydi.

²¹Tarafkashlik yaxshi emas, bir toʻgʻram non deb odam vafosizlik qiladi.

²²Xasis odam boylik orqasidan quvib, boshiga qashshoqlik kelishini bilmaydi.

²³Tanqid qiladigan odam xushomadgoʻyga qaraganda koʻproq marhamat topadi.

²⁴Ota — onasining mulkini oʻgʻirlab, “Bu gunoh emas” degan odam buzgʻunchiga sherikdir.

²⁵Ochkoʻz janjal chiqaradi, Egamizga ishongan esa toʻq yashaydi.

²⁶Oʻzigagina ishongan ahmoqdir, aql bilan yuradigan esa najot topadi.

²⁷Kambagʻalga bergan odam kam boʻlmaydi, koʻrib — koʻrmaslikka olgan esa koʻp la’natga uchraydi.

²⁸Fosiqlar martabaga erishsa odamlar yashirinadi, fosiqlar halokatga yoʻliqqanda esa solihlar koʻpayadi.