Read Uzbek Muqaddas Kitob Hikmatlar 29 Bible Online

Hikmatlar 29 - Uzbek Muqaddas Kitob bible

Hikmatlar 29

¹Tanbeh olsa ham oʻjarligicha qoladigan odam birdaniga halokatga uchraydi, shifo topmaydi.

²Solihlar koʻpayganda xalq sevinadi, fosiq hukmron boʻlganda esa figʻon chekadi.

³Donolikni sevgan oʻgʻil otasini sevintiradi, fohisha bilan aloqada boʻlgan mol — mulkini sovuradi.

⁴Shoh yurtni adolat bilan mustahkamlaydi, sovgʻani sevadigan esa xarob qiladi.

⁵Doʻstiga xushomad qilgan odam oʻz[96] oyoqlariga tuzoq qoʻyganday boʻladi.

⁶Fosiqning gunohi qopqon, solih esa qoʻshiq aytib quvonadi.

⁷Solih ojizning haq — huquqini biladi, fosiqda esa bunday tushuncha ham yoʻq.

⁸Mazax qiluvchilar shaharda toʻpolon qiladi, donolar esa gʻazabni tinchlantiradi.

⁹Dono ahmoqni sudlashgani mahkamaga olib borsa, ahmoq janjal qiladi, haqoratlaydi. Dono esa halovatga erishmaydi.

¹⁰Qonxoʻr odam pokdil insondan nafratlanadi, toʻgʻrining jonini olmoqchi boʻladi[97].

¹¹Nodon bor jahlini toʻkib soladi, dono esa ichida saqlaydi.

¹²Hukmdor yolgʻonga quloq solsa, barcha xizmatkorlari fosiq boʻladi.

¹³Zolim bilan ojizning bir oʻxshashligi bor: ikkoviga ham Egamiz koʻz nuri bergan.

¹⁴Shoh kambagʻalni adolat bilan hukm qilsa, uning taxti abadiy mustahkam turadi.

¹⁵Qamchi va nasihat aql kiritadi, oʻz holiga tashlab qoʻyilgan bola esa onasiga uyat keltiradi.

¹⁶Fosiq koʻpayganda gunoh ham koʻpayadi, solih esa fosiqning halokatini koʻradi.

¹⁷Farzandingga[98] tarbiya ber: u senga orom keltiradi, qalbingni shodlikka toʻldiradi.

¹⁸Vahiy boʻlmasa el — yurt yoʻldan ozadi, Xudoning qonuniga amal qilgan baxtlidir!

¹⁹Qul faqat soʻz bilan tarbiyalanmaydi, soʻzni tushunsa ham amal qilmaydi.

²⁰Oʻylamay gapiradiganni koʻrganmisan?! Undan koʻra, nodondan umid koʻproq.

²¹Qulni yoshligidan erkalatib oʻstirsa, oqibatda xoʻjayiniga qaygʻu boʻladi[99].

²²Serjahl odam janjal chiqaradi, serzarda koʻp gunoh qiladi.

²³Odamning magʻrurligi uni past qiladi, kamtarin esa izzat — hurmat topadi.

²⁴Oʻgʻriga sherik boʻlgan oʻz jonini yomon koʻradi, u tanbeh eshitsa ham churq etmaydi.

²⁵Odamdan qoʻrqish tuzoqqa ilintiradi, Egamizga umid bogʻlagan esa xavf — xatardan xoli boʻladi.

²⁶Hukmdor marhamatini qidirgan koʻp, lekin insonni hukm qiladigan Egamizdir.

²⁷Fosiq solihga jirkanch, toʻgʻri yuradigan esa fosiqqa jirkanchdir.