Read Uzbek Muqaddas Kitob Hikmatlar 3 Bible Online

Hikmatlar 3 - Uzbek Muqaddas Kitob bible

Hikmatlar 3

¹Oʻgʻlim[13], soʻzlarimni unutma, amrlarimni yuragingda saqla.

²Ular umringga umr qoʻshadi, hayoting tinch boʻladi.

³Sevgi va sadoqatni aslo tark etma. Boʻyningga marjon qilib taqib ol, yuraging qa’riga yozib qoʻy.

⁴Shunda Xudoning ham, odamlarning ham mehrini qozonasan, ulardan izzat — hurmat topasan.

⁵Oʻz aql — idrokingga suyanma, butun qalbing bilan Egamizga ishon.

⁶Har ishingda Egamizni e’tirof et, shunda U yoʻllaringni toʻgʻrilaydi[14].

⁷Oʻzingni dono hisoblama. Egamizdan qoʻrq[15]. Yomonlikdan yuz oʻgirgin.

⁸Shunday qilsang jisming sogʻ, joning ham omon boʻladi.

⁹Oʻz boyliging, birinchi hosiling bilan Egamizni ulugʻla.

¹⁰Shunda omboring toʻlib — toshadi, yangi sharobing yetib ortadi.

¹¹Oʻgʻlim, Egamizning tarbiyasini rad qilmagin, Uning tanbehidan ruhing tushmasin.

¹²Ota yaxshi koʻrgan farzandini[16] jazolagandek, Egamiz ham yaxshi koʻrgan bandasini jazolaydi[17].

¹³Donolikka erishgan, aql — idrok topgan qanday baxtlidir!

¹⁴Chunki uning bahosi kumushdan, foydasi oltindan ham afzalroqdir.

¹⁵U javohirlardan ham azizdir, sen tilagan biror narsa Unga teng kelmaydi.

¹⁶Uning oʻng qoʻlida uzoq umr, chap qoʻlida esa boylik va shon — shuhrat bor.

¹⁷Yoʻli — shodlik yoʻli, barcha soʻqmoqlari tinchdir.

¹⁸Donolikni quchganlar uchun u hayot daraxti kabidir, uni mahkam tutganlar baxtlidir.

¹⁹Egamiz donolik bilan yerni yaratdi, aql — idroki bilan osmonni oʻz oʻrniga joylashtirdi.

²⁰Uning aqli bilan chuqurliklar boʻlingan, bulutlardan shudring tushgan.

²¹Oʻgʻlim, donolik va fahm — farosatni mahkam ushla, nazaringdan qochirmagin.

²²Oʻshanda ular joningga hayot baxsh etadi, boʻyningga bezakday boʻladi.

²³Yoʻlingda eson — omon yurasan, oyogʻing qoqilmaydi.

²⁴Bexavotir yotasan, uyqung shirin boʻladi.

²⁵Bexosdan keladigan ofatdan qoʻrqma. Yovuz odam hujum qilganda ham qoʻrqma.

²⁶Chunki Egamiz yoningda boʻladi, seni qoqilishdan asraydi.

²⁷Yaxshilik qilish qoʻlingdan kelsa, muhtojlardan yordamingni ayama.

²⁸Oʻzingda bor boʻlsa, qoʻshningga “kechroq kel”, “ertaga beraman”, deb aytma.

²⁹Senga ishonib, yoningda tinchgina yashayotgan qoʻshningga qarshi yomon niyat qilma.

³⁰Senga yomonlik qilmagan odam bilan sababsiz urishma.

³¹Zoʻravonga hasad qilma, u qiladigan ishlarni qilma.

³²Chunki Egamizga yovuzlar jirkanchdir, U toʻgʻri odamga hamroh boʻladi.

³³Fosiqning uyi Egamizning la’natiga, solihning uyi esa qut — barakaga toʻladi.

³⁴U mazax qiluvchilarni mazax qiladi, kamtarlarga esa inoyat koʻrsatadi.

³⁵Donolar shon — shuhratga erishadilar, nodonlar esa sharmandalikka duchor boʻladilar.