Read Uzbek Muqaddas Kitob Hikmatlar 30 Bible Online

Hikmatlar 30 - Uzbek Muqaddas Kitob bible

Hikmatlar 30

¹Yoxining oʻgʻli Agʻurning Ixtiyolga bergan, Itel va Uxalga aytgan soʻzlari[100]:

²“Rostdan ham odamlar orasida eng aqlsizi ekanman, insonning aql — idroki menda yoʻq.

³Na donolikni oʻrganibman, na Muqaddas Xudoni bilibman.

⁴Kim osmonga koʻtarilgan, osmondan tushgan? Shamolni hovuchlariga yiqqan kim? Kim suvni oʻz kiyimiga oʻragan? Yerning barcha chegaralarini oʻrnatgan kim? Uning ismi nima? Oʻgʻlining ismi — chi? Bilasan — ku!

⁵Xudoning har bir soʻzi haqiqatdir, Oʻzi esa Unga umid bogʻlaganning qalqoni.

⁶Uning soʻzlariga qoʻshma, U jazolasa, yolgʻoning fosh etilsa nima qilasan?

⁷Sendan ikki narsani soʻrayman, oʻlmasimdan oldin qilgin.

⁸Soxtalik va yolgʻonni mendan uzoqlashtir, menga qashshoqlik ham, boylik ham emas, faqat nasibamni bergin.

⁹Qornim toʻyganda: «Egam kim oʻzi?» deb aytmayin, kambagʻallikdan oʻgʻrilik qilib, Uni badnom qilmayin.

¹⁰Qul seni la’natlamasligi uchun uni egasiga yomonlama, boʻlmasa jazolanasan.

¹¹Shunday nasl borki, otasiga la’nat oʻqiydi, onasini duo qilmaydi.

¹²Shunday nasl borki, oʻzining nazarida pok, lekin iflosligidan tozalanmagan.

¹³Shunday nasl bor, koʻzlari qanchalik takabbur, qarashlari ham magʻrur.

¹⁴Shunday nasl borki, tishlari — qilich, qoziq tishlari esa pichoq, yer yuzidan kambagʻalni, odamlar orasidan muhtojni yoʻqotadi.

¹⁵Zulukning ikki qizi bor: «Ber, ber!» — deb aytadi. Hech qachon qoniqmaydigan uch narsa, yetarli, demaydigan toʻrt narsa bor.

¹⁶Doʻzax[101], bepusht bachadon, suvsiragan tuproq hamda olov, yetarli, demaydi.

¹⁷Otani mazaxlaydiganning, onaga boʻysunishni rad etadiganning koʻzlarini quzgʻunlar choʻqiydi, kalxat bolalari yeydi.

¹⁸Meni hayron qoldiradigan uch narsa bor, toʻrt narsa borki, aqlimga sigʻmaydi:

¹⁹havodagi burgutning yoʻli, tosh ustidagi ilonning yoʻli, dengiz oʻrtasidagi kemaning yoʻli hamda qizga yuradigan erkaklarning yoʻli.

²⁰Zinokor ayolning yoʻli ham shundaydir: u yeb boʻlgach, ogʻzini artib: «Hech bir egrilik qilmadim — ku!» deydi.

²¹Yer uch narsadan larzaga keladi, toʻrt narsani koʻtara olmaydi:

²²qul shohlik qilganda, ahmoq toʻyganda,

²³shallaqi ayol erga tekkanda, choʻri bekasining oʻrnini olganda.

²⁴Yer yuzida toʻrtta kichkina narsa bor, lekin oʻta dono:

²⁵chumolilar zaif, lekin yeguligini yozda tayyorlaydi.

²⁶Boʻrsiq kamquvvat, lekin inini qoyaga quradi.

²⁷Chigirtkalarning[102] sardori yoʻq, lekin barchasi hamjihat yurish qiladi.

²⁸Oʻrgimchakni[103] qoʻl bilan ushlasa boʻladi, lekin saroyda ham yuradi.

²⁹Yurishi salobatli uch narsa, qadami ulugʻvor toʻrt narsa bor:

³⁰sher hayvonlar ichida eng kuchlisi, hech nimadan qochmaydi.

³¹Maqtanib yuradigan xoʻroz[104], serka va gʻolib shoh[105].

³²Agar ahmoqlik qilib oʻzingni maqtagan boʻlsang, birovga yomonlik qilaman, deb aytgan boʻlsang, ovozingni oʻchir, ogʻzingni yop!

³³Chunki kuv[106] pishsa yogʻ chiqadi, burunga ursa qonaydi, jahlni qoʻzgʻatsa janjal chiqadi.”