Read Uzbek Muqaddas Kitob Hikmatlar 31 Bible Online

Hikmatlar 31 - Uzbek Muqaddas Kitob bible

Hikmatlar 31

¹Shoh Lemulning soʻzlari. Bu soʻzlarni unga onasi oʻrgatgan:

²“Oʻgʻlim, nima desam ekan? Nima deyin, ey jigarbandim? Xudodan tilab olgan oʻgʻlim, senga ne aytay?

³Quvvatingni xotinlarga berma, shohni buzadiganlarga hayotingni sarf qilma.

⁴Ey Lemul, shohlar uchun emas sharob, may amaldorlar uchun emas!

⁵Ular ichib qonunni unutadi, ezilgan xalqni hukm etishda egrilik qiladi.

⁶Mayni halok boʻlayotganga, sharobni qaygʻu chekkanga bergin.

⁷Ular ichib kambagʻalligini unutsin, falokatlarini eslamasin.

⁸Ogʻzingni gung uchun ochgin, boshiga kulfat tushganlarning tarafini olgin.

⁹Gapir, adolat bilan hukm qil, bechora va kambagʻallarni himoya qil.”

¹⁰[107] Farosatli xotinni kim topa oladi? Uning bahosi gavhardan ham baland.

¹¹Eri unga yurakdan ishonadi, hech narsaga muhtoj boʻlmaydi.

¹²U eriga yomonlik emas, bir umr yaxshilik qiladi.

¹³Jun va surp topadi, xursand boʻlib oʻz qoʻli bilan ishlaydi.

¹⁴Savdo kemalari kabi uzoqdan nonini keltiradi.

¹⁵Qorongʻida oʻrnidan turib, uy ahlini ovqatlantiradi, xizmatkorlariga topshiriq[108] beradi.

¹⁶Niyat qilib, dala sotib oladi, oʻz qoʻli bilan uzumzor yaratadi.

¹⁷Belini mahkam bogʻlab, qoʻllariga quvvat beradi.

¹⁸Qilgan ishining rohatini koʻradi, tunlari ham chirogʻi oʻchmaydi.

¹⁹Qoʻlini charxga qoʻyadi, barmoqlari ip yigiradi.

²⁰Kambagʻallarga qoʻlini uzatadi, muhtojlarga rahm qiladi.

²¹Uy ahli uchun qish — qirovdan qoʻrqmaydi, chunki ular hammasi qalin kiyintirilgan.

²²Oʻzi uchun soʻzana tikadi, libosi kimxob va shoyidandir.

²³Eri yurt oqsoqollari orasida oʻtiradi, shahar darvozasida[109] tanilgan.

²⁴Yana shoyidan kiyim tikib sotadi, savdogarlarga belbogʻ yetkazib beradi.

²⁵Libosi — quvvat, sharaf, u kelajakka qarab quvonadi.

²⁶Donolik bilan soʻzlaydi, mehr bilan nasihat qiladi.

²⁷Uy ahliga yaxshi qaraydi, dangasalik qilmaydi.

²⁸Bolalari turib uni duo qiladi, eri ham maqtaydi:

²⁹“Farosatli ayollar koʻp, ammo sen hammasidan a’losan.”

³⁰Joziba aldamchi, chiroy esa oʻtkinchidir, ammo Egamizdan qoʻrqadigan ayol[110] koʻkka koʻtariladi.

³¹Mehnatining mevasini koʻrsin, ishlari darvozalarda uni sharaflasin.