Read Uzbek Muqaddas Kitob Hikmatlar 4 Bible Online

Hikmatlar 4 - Uzbek Muqaddas Kitob bible

Hikmatlar 4

¹Oʻgʻillarim, otangizning pand — nasihatlariga quloq solinglar, e’tibor berib farosatli boʻlinglar.

²Sizlarga yaxshi saboq beraman, soʻzlarimdan yuz oʻgirmanglar.

³Men ota — onamning yolgʻiz, yosh oʻgʻli edim.

⁴Bolaligimda otam menga shunday derdi: “Soʻzlarimni yuragingga jo qilib, amrlarimni bajargin, shunda yashaysan.

⁵Dono boʻl, idrokli boʻl, ularni unutma, soʻzlarimdan chiqma.

⁶Donolikdan yuz oʻgirma, seni himoya qiladi, uni sevgin, seni asraydi.

⁷Donolikning boshi shudir, dono boʻl, bor — yoʻgʻingni berib boʻlsa ham, idrok ol[18].

⁸Uni hurmat qil, seni koʻkka koʻtaradi. Uni quchgin, seni shon — shuhratga erishtiradi.

⁹Boshingga iltifot gulchambari, shuhrat tojini kiydiradi.”

¹⁰Oʻgʻlim[19], aytganlarimga quloq solib qabul qil, shunda umring uzoq boʻladi.

¹¹Senga donolik yoʻllarini oʻrgatdim, toʻgʻri yoʻldan olib yurdim.

¹²Yurganingda toʻsiqqa uchramaysan, yugurganingda qoqilmaysan.

¹³Yoʻl — yoʻriqlarimni qattiq ushla, qoʻyib yuborma, ularni qoʻriqla, chunki ular hayotingdir.

¹⁴Fosiqning soʻqmoqlariga oyoq bosma, yovuzlar yoʻlidan yurma.

¹⁵Hatto nazar solma, yonidan ham oʻtma, qayrilib uzoqdan yurgin.

¹⁶Chunki ular yomonlik qilmasdan uxlay olmaydi, birortasiga zarar keltirmaguncha uyqulari kelmaydi.

¹⁷Ular fosiqlik nonini yeydi, zoʻravonlik sharobini ichadi.

¹⁸Solihning yoʻli tongga oʻxshaydi, kun chiqquncha tong yorishaveradi.

¹⁹Fosiqning yoʻli esa zulmat kabidir, nimaga qoqilib ketishini bilmaydi.

²⁰Oʻgʻlim, soʻzlarimni eshit, aytganlarimga quloq sol.

²¹Ularni koʻz oldingdan qochirma, yuragingning qa’rida saqlagin.

²²Chunki ularni topganlarga hayot, butun tan — joniga malham boʻladi.

²³Bor kuching bilan qalbingni asra, chunki u hayot bulogʻidir.

²⁴Ogʻzingdan egrilikni, tilingdan ayyorlikni olib tashla.

²⁵Koʻzlaring toʻgʻriga qarasin, nigohing oldingga qaratilgan boʻlsin.

²⁶Toʻgʻri yoʻlni tanlab yur[20], qadamingni oʻylab bos.

²⁷Oʻngga ham, chapga ham ogʻma, yovuzlikdan uzoqlash.