Read Uzbek Muqaddas Kitob Hikmatlar 5 Bible Online

Hikmatlar 5 - Uzbek Muqaddas Kitob bible

Hikmatlar 5

¹Oʻgʻlim[21], donoligimga e’tibor ber, aql — idrokimga quloq sol,

²toki fahm — farosating yoʻqolmasin, biliming saqlansin.

³Buzuq ayolning tilidan bol tomadi, soʻzlari — malhamday yumshoq,

⁴ammo oqibati zaharday achchiq, xanjarday oʻtkirdir.

⁵Oyoqlari oʻlim tomon yuradi, qadamlari oʻliklar diyoriga[22] yetaklaydi.

⁶U hayotga olib boradigan yoʻlga e’tibor bermaydi, yoʻllari beqaror, oʻzi buni bilmaydi.

⁷Oʻgʻlim[23], menga quloq sol, soʻzlarimdan chiqma.

⁸U ayoldan uzoqroq yur, uning eshigiga yaqinlashma.

⁹Boʻlmasa, oʻz obroʻyingni begonalarga, hayotingni yovuzlarga bergan boʻlasan.

¹⁰Boyligingdan begonalar bahramand boʻladi, mehnat bilan topgan mol — mulking oʻzgalarning uyida boʻladi.

¹¹Umring oxirida, vujudingu tanangdan asar qolmagach, faryod qilasan.

¹²Oʻshanda shunday deysan: “Men intizom va tanqiddan qanchalik nafratlanar edim — a,

¹³na ustozlarimga, na nasihat berganlarga quloq solibman.

¹⁴Ana oqibat, jamoa orasida halokat qirgʻogʻiga kelib qoldim.”

¹⁵Oʻz sardobangdagi, oʻz qudugʻingdagi suvni[24] ichaver.

¹⁶Buloqlaring tashqarida, irmoqlaring koʻchada oqsinmi?!

¹⁷Uni begonalar bilan baham koʻrma, faqat oʻzingniki boʻlsin.

¹⁸Bulogʻing suvlari muborak boʻlsin, koʻz ochib koʻrganing bilan quvongin.

¹⁹Jozibali ohu va goʻzal kiyik! Uning ogʻushi seni qoniqtirsin, doim uning sevgisi bilan qanoatlangin.

²⁰Nega endi, oʻgʻlim, begona xotinni koʻngling qoʻmsaydi? Nimaga begona ayolning ogʻushini quchasan?

²¹Insonning xatti — harakatlari Egamizning koʻzi oldidadir. Egamiz odamning barcha ishlarini kuzatib turadi.

²²Fosiqning ishlari uning oʻzini ushlaydi, gunohlari uni zanjirband qiladi.

²³U ahmoqligi tufayli yoʻldan ozadi, tarbiyasizligi dastidan oʻladi.