Read Uzbek Muqaddas Kitob Hikmatlar 6 Bible Online

Hikmatlar 6 - Uzbek Muqaddas Kitob bible

Hikmatlar 6

¹Oʻgʻlim[25], oʻzgaga kafillik qilib, begona bilan ahdlashgan boʻlsang[26],

²oʻz tilingdan ilinib, soʻzlaring tuzoqqa yetaklagan boʻlsa,

³oʻgʻlim, oʻzganing qoʻliga tushib qolibsan, oʻzingni qutqar, bor, tiz choʻkib yolvor.

⁴Oʻzingga uyqu berma, bir soniya ham dam olma.

⁵Ovchidan qochgan ohu kabi, bedanavoz qoʻlidan qochgan bedanaday oʻzingni qutqar.

⁶Ey tanbal, chumolilarga bir qara, ularning xatti — harakatlarini koʻrib dono boʻl.

⁷Ularning na rahbari, na nazoratchisi, na hukmdori bor.

⁸Lekin ular yozda oziq toʻplashadi, oʻrim paytida don — dun yigʻishadi.

⁹Sen — chi, tanbal, qachongacha uxlaysan?! Qachon oʻrningdan turasan?

¹⁰“Bir oz uxlay, bir mizgʻib olay, yonboshlab birpas dam olay”, deysan.

¹¹Shuning uchun qashshoqlik yoʻltoʻsarday, muhtojlik qaroqchiday ustingga keladi.

¹²Ayyor va nopoklar yaramas soʻzlarni gapirib yuradilar.

¹³Koʻz qisadilar, oyoq — qoʻllari bilan imo — ishora qiladilar.

¹⁴Yuraklarida doim yovuz niyat qilib, odamlar orasida janjal chiqaradilar.

¹⁵Shuning uchun toʻsatdan ofatga uchraydilar, shifo topmay toʻsatdan halok boʻladilar.

¹⁶Olti narsadan Egamiz nafratlanadi, yetti narsadan U jirkanadi. Bular:

¹⁷manmanlik nigohi, yolgʻonchi til, begunoh qonni toʻkadigan qoʻllar,

¹⁸yomon niyatli yurak, yovuzlikka yuguradigan oyoqlar,

¹⁹yolgʻon gapiradigan soxta guvoh, aka — ukalar orasiga nifoq soluvchilardir.

²⁰Oʻgʻlim, otang nasihatlariga quloq sol, onang oʻgitlarini rad etma,

²¹ularni doim yuragingda saqla, boʻyningga taqib ol.

²²Yurganingda ular senga yoʻl koʻrsatadi, uxlaganingda qoʻriqlaydi, uygʻoqligingda senga gapiradi.

²³Chunki amrlar — chiroq, tanbeh — hayot yoʻli, pand — nasihatlar nurdir.

²⁴Ular seni boshqalarning xotinidan, zinokor ayolning shirin soʻzidan saqlaydi.

²⁵Yuragingda uning goʻzalligini orzu qilmagin, koʻzlariga mahliyo boʻlma.

²⁶Fohishaga bittagina non haqi yetarli, ammo oʻzganing xotini bilan qilingan zino butun hayotingni barbod qiladi.

²⁷Qoʻyinga choʻgʻ solganda kiyimni kuydirmay boʻladimi?!

²⁸Choʻgʻ ustida yurganda oyoqni kuydirmay boʻladimi?!

²⁹Oʻzganing xotini oldiga kirganning ahvoli ham shunday, begona ayolga tekkan jazosiz qolmaydi.

³⁰Qorni ochligidan oʻzini toʻydirish uchun oʻgʻrilik qilsa, odamlar undan nafratlanmaydi.

³¹Lekin qoʻlga tushib qolganda oʻgʻirlangan molining haqini yetti barobar qilib qaytarishi kerak.

³²Zino qilgan aqlsizdir, oʻzini oʻzi nobud qiladi.

³³U koʻp kaltak yeb sharmanda boʻladi, bir umrga badnom boʻladi.

³⁴Chunki rashk erni gʻazablantiradi, er qasos olganda shafqat qilmaydi.

³⁵Har qanday hadyani rad etadi, qancha pora bersang olmaydi.