Read Uzbek Muqaddas Kitob Hikmatlar 7 Bible Online

Hikmatlar 7 - Uzbek Muqaddas Kitob bible

Hikmatlar 7

¹Oʻgʻlim[27], soʻzlarimni asra, amrlarimni dilingda saqla.

²Amrlarimni saqlab yasha, ta’limotimni koʻz qorachigʻingdek asra.

³Ularni barmogʻingga bogʻla, yuraging qa’riga yozib qoʻy.

⁴Donolikni singlim, aql — idrokni qardoshim deb atagin.

⁵Ular seni zinokordan, tilyogʻlama buzuq ayoldan asraydi.

⁶Uyimdagi deraza panjarasi ortidan qaradim,

⁷sodda[28] yoshlarning orasida, bir aqlsiz yigitni koʻrib qoldim.

⁸Yigit koʻchadan oʻtib, zinokor ayolning uyi tomon ketayotgan edi.

⁹Oqshom. Kech. Tun qorongʻi edi.

¹⁰Shunda fohishaga oʻxshab kiyingan, makkor niyatli ayol uni kutib olgani chiqdi.

¹¹U shallaqi, oʻjar, hech qachon uyida turmaydi.

¹²Bir qarasang koʻchada, bir qarasang maydonda, yana bir qarasang har xil burchakda turgan boʻladi.

¹³U yigitni quchoqlab, oʻpib, benomuslarcha shunday dedi:

¹⁴“Bugun qurbonlik keltirdim, va’dalarimni bajardim[29].

¹⁵Shuning uchun seni kutib olishga chiqdim, seni qidirib topdim.

¹⁶Toʻshagimni Misrdan keltirilgan rangli mato bilan bezadim.

¹⁷Mirra[30], dolchin va aloedan boʻlgan xushboʻy atirlar sepdim.

¹⁸Qani, yur, tongga qadar kuyov — kelinday rohat qilaylik, huzur — halovat qilaylik.

¹⁹Erim hozir uyda emas, uzoq safarga ketgan.

²⁰Bir hamyon kumush tanga olib ketgan, oy toʻlmaguncha qaytib kelmaydi.”

²¹Koʻp shirin soʻzlar va muloyim gaplar bilan u yigitni yoʻldan urdi.

²²Yigit oʻsha zahotiyoq, kushxonaga ketayotgan hoʻkizday, tuzoqqa oyoq qoʻyayotgan kiyikday[31] uning orqasidan ergashdi.

²³U tuzoqqa kirayotgan qushday, nayza jigariga tegmaguncha hayotini yoʻqotishini bilmaydi.

²⁴Oʻgʻillarim, menga quloq solib, soʻzlarimga e’tibor beringlar.

²⁵Yuragingiz oʻsha ayolning yoʻliga burilmasin, uning soʻqmoqlarida adashmang.

²⁶U koʻplarni halok qildi, qurbonlari ham koʻp.

²⁷Uning uyi oʻliklar diyoriga[32] yetaklovchi yoʻldir, oʻlimga olib boradi.