Read Uzbek Muqaddas Kitob Hikmatlar 8 Bible Online

Hikmatlar 8 - Uzbek Muqaddas Kitob bible

Hikmatlar 8

¹Donolik[33] chorlamaydimi?! Idrok ovozini baland qilib chaqirmaydimi?!

²Qir — adirlarda, yoʻl boʻylarida, chorrahalarda,

³shahar darvozalarida[34], eshiklar oldida turib jar soladi:

⁴“Ey insonlar, sizlarni chaqiryapman, odamzodga gapirmoqdaman.

⁵Soddalar[35], fahm — farosatli boʻling, nodonlar, idrokli boʻling.

⁶Quloq soling, men a’lo gaplarni gapiraman, rostini aytaman.

⁷Chunki tilim haqiqatni gapiradi, fosiqlikdan esa nafratlanadi.

⁸Hamma soʻzlarim toʻgʻridir, ularda na egrilik, na buzuqlik bor.

⁹Farosatlilarga ravshan, bilim oladiganlarga toʻgʻridir.

¹⁰Kumush oʻrniga nasihatlarimni, oltin oʻrniga ilm — ma’rifatni tanlang.

¹¹Chunki donolik koʻhinurdan a’loroqdir, hech qanday shodlik U bilan tenglasha olmaydi.

¹²Men, Donolik[36], aql — idrok bilan yashayman, bilim va fahm — farosat mendadir.

¹³Egamizdan qoʻrqish[37] yomonlikdan nafratlanish demakdir. Men magʻrurlik va manmanlikdan, yovuzlik va buzuq tildan nafratlanaman.

¹⁴Menda maslahat va haqiqat bor, men idrokman, quvvatu kuch ham mendadir.

¹⁵Shohlar men orqali hukm suradilar, hukmdorlar toʻgʻri qonunlar chiqaradilar.

¹⁶Men orqali rahbarlar boshqaradilar, amaldor va barcha odil hakamlar hukm chiqaradilar.

¹⁷Kim meni sevsa oʻshani sevaman, astoydil izlaganlar meni topadilar.

¹⁸Boylik, shuhrat, bitmas — tuganmas xazina, farovonlik mendadir.

¹⁹Mening hosilim toza oltindan ham, a’lo kumushdan ham yaxshiroq.

²⁰Men toʻgʻri yoʻldan, adolat soʻqmoqlaridan yuraman.

²¹Meni sevganlar boylikni meros qilib oladilar, ularning xazinasini toʻldiraman.

²²Egamiz yaratish ishlarini boshlamasdan oldin, meni bunyod qilgan edi.

²³Azalda, eng boshida, dunyo yaratilmasdan oldin, U meni tayinlagan edi.

²⁴Tubsiz dengizu bepoyon ummon, yo birorta buloq koʻz ochmay turib, men dunyoga keltirilganman.

²⁵Togʻu tosh, qir — adir barpo boʻlmasdan oldin men tavallud topganman.

²⁶U hali na yer, na dalalarni, na yerning tuprogʻini yaratgan edi.

²⁷Xudo osmonni yaratganda, bepoyon ummon uzra falakni barpo etganda, men oʻsha yerda edim.

²⁸Osmonga bulutlarni joylab, dengizlarni suv bilan toʻldirgan chogʻda,

²⁹U suv toshib ketmasin deb amr berganda, yerga asos solganda[38],

³⁰men Uning yonida musavvir edim, qoshida kundan — kunga zavqlanib, doimo quvonardim.

³¹Dunyoda, Uning yerida odamzod bilan xursand boʻlardim.

³²Oʻgʻillarim, menga quloq solinglar, yoʻlimdan yurganlar baxtlidir.

³³Pand — nasihatlarimni tinglab dono boʻlinglar, uni rad etmanglar.

³⁴Har kuni ostonamda kutib, eshigimni poylab, soʻzlarimga quloq soladigan baxtlidir.

³⁵Chunki meni topgan hayot topadi, Egamizning marhamatiga sazovor boʻladi.

³⁶Meni koʻzdan qochirgan oʻziga zarar yetkazadi, mendan nafratlangan oʻlimni sevadi.”