Read Uzbek Muqaddas Kitob Hikmatlar 9 Bible Online

Hikmatlar 9 - Uzbek Muqaddas Kitob bible

Hikmatlar 9

¹Donolik[39] uy qurdi, uyining yetti ustunini qoʻydi.

²Qurbonlik keltirdi, sharob tayyorlab, dasturxon yozdi.

³Xizmatkorlarini shaharning eng baland joyiga yuborib, ular orqali:

⁴“Kim sodda[40] boʻlsa, bu yoqqa kelsin”, — deb chaqirdi, aqlsizlarga shunday dedi:

⁵“Kelinglar, taomimdan yenglar. Men tayyorlagan sharobdan ichinglar.

⁶Gʻaflatdan voz kechinglar, shunda yashaysizlar, idrok yoʻlidan yuringlar.”

⁷Mazax qiluvchiga tanbeh bergan tahqirlanadi, fosiqning xatosini aytgan haqoratlanadi.

⁸Mazax qiluvchiga tanbeh berma, aks holda, u sendan nafratlanadi. Donoga tanbeh ber, shunda u seni sevadi.

⁹Donoga oʻrgatsang, yanada donoroq boʻladi. Solihni oʻqitsang, bilimini koʻpaytiradi.

¹⁰Egamizdan qoʻrqish[41] donolikning boshidir[42], Muqaddas Xudoni bilish idrokdir.

¹¹Chunki donolik tufayli umringga umr qoʻshiladi.

¹²Dono boʻlsang oʻzingga foyda, mazax qilsang oʻzing jabr tortasan.

¹³Ahmoq ayol shallaqi va farosatsizdir, u hech narsani bilmaydi.

¹⁴Uyining eshigi oldida, shaharning eng baland joyida oʻtirib,

¹⁵yoʻlida toʻgʻri yurgan, yonidan oʻtib ketayotganlarni:

¹⁶“Kimki sodda boʻlsa, bu yoqqa kelsin”, — deb chaqiradi, aqlsizlarga shunday deydi:

¹⁷“Oʻgʻirlangan suv shirindir, berkitib yeyilgan non mazali.”

¹⁸Lekin u yerda arvohlar borligini, uning mehmonlari oʻliklar diyorining[43] qa’rida ekanligini bilmaydilar.