Read Uzbek Muqaddas Kitob Voiz 1 Bible Online

Voiz 1 - Uzbek Muqaddas Kitob bible

Voiz 1

¹Quyidagilar Dovud oʻgʻli, Quddusda hukmronlik qilgan Voizning[2] soʻzlaridir.

²“Behuda![3] Behuda! — deydi Voiz. — Hammasi behudadir!”

³Odam bu dunyoda qilgan mehnatidan Qanday foyda topar?

⁴Avlod kelib, avlod ketar, Bu dunyo esa shundayligicha qolaverar.

⁵Quyosh chiqib yana botar, Chiqqan joyiga qaytishga shoshar.

⁶Shamol janubga esar, Shimol tarafga yelar, Takror — takror aylanib, Oʻz yoʻlidan yuraverar.

⁷Barcha daryolar dengizga oqar, Dengiz esa hech toʻlmas, Shunda ham oʻz makoni sari Oqaverar daryolar.

⁸Hamma narsa charchatar, holdan toydirar, Ularni tasvirlashga soʻzlar ham yetmas. Koʻzlarimiz koʻraverar, ammo toʻymas, Quloqlarimiz eshitaverar, ammo qoniqmas.

⁹Oldin nima boʻlgan boʻlsa, yana sodir boʻlgay, Nima qilingan boʻlsa, yana qaytarilgay, Bu dunyoda hech qanday yangi narsa yoʻq.

¹⁰Biror narsa bormidiki, biz bu haqda: “Qaranglar, bu yangilik — ku!” — deb ayta olsak?! U oldindan bor edi, biz tavallud topmasdan oldin ham shu yerda edi.

¹¹Qadimda boʻlganlar esga olinmas, hatto bundan keyin boʻladiganlar ham kelajakda eslanmas.

¹²Men, Voiz, Isroil ustidan Quddusda shohman.

¹³Oʻzimni donolik bilan izlanishga, mana shu dunyoda boʻlayotgan hamma ishlarni tushunishga bagʻishladim. Xudo insonga bergan bu ish qanday qaygʻuli — a!

¹⁴Men bu dunyoda boʻlayotgan hamma narsani koʻrdim, qaranglar, hammasi behuda, shamolning orqasidan quvishday ekan.

¹⁵Egri narsani toʻgʻrilab boʻlmas, Yoʻq narsani sanab boʻlmas.

¹⁶Oʻzimga shunday dedim: “Mana, men buyuk boʻlib, donolikda mendan oldin Quddusda hukmronlik qilganlarning hammasidan oʻzib ketdim. Koʻp donolik orttirdim, ilmu ma’rifatni yaxshilab oʻrgandim.”

¹⁷Donolik va ilm — ma’rifatning foydasi telbalik va ahmoqlikdan ustunligini anglab yetishga oʻzimni bagʻishladim, ammo bu ham shamolning orqasidan quvishday ekanligini tushundim.

¹⁸Qaygʻu ham ortarkan, donolik qancha koʻp boʻlsa, Dard koʻpayar ekan gar bilim oshsa.