Read Uzbek Muqaddas Kitob Voiz 10 Bible Online

Voiz 10 - Uzbek Muqaddas Kitob bible

Voiz 10

¹Oʻlik pashshalar xushboʻy moyni sasitib yuboradi, shuningdek, ozgina ahmoqlik koʻp donolikdan ogʻirroq chiqadi.

²Dononing yuragi oʻngga — toʻgʻri ishlarni qilishga, nodonniki esa chapga — fosiqlikka tortadi.

³Ahmoqlar aqli yetmay, qilgan qiliqlari bilan ham hammaga ahmoqligini koʻrsatadi.

⁴Agar hukmdorning sendan jahli chiqsa, joyingni tashlab ketmagin, chunki vazminlik tufayli xafagarchiliklar ham bosilib ketadi.

⁵Mana men bu dunyoda koʻrgan fojia, hukmdordan boshlangan katta xato:

⁶ahmoqlar baland lavozimga koʻtariladi, boylar esa pastda oʻtirishadi.

⁷Men yana shuni koʻrdim: zodagonlar xuddi qullarday piyoda yurganda, qullar otda yurardi.

⁸Chuqur qaziganning oʻzi unga tushishi, devorni buzganni esa ilon chaqishi mumkin.

⁹Tosh kesgan oʻziga zarar yetkazishi, xoda yorgan esa ogʻriqqa duchor boʻlishi mumkin.

¹⁰Agar bolta oʻtmas boʻlsa — yu, uni oʻtkirlamasang, uni ishlatish uchun koʻproq kuch kerak boʻladi. Mana, donolikdan qanday foyda bor ekan.

¹¹Ammo ilon oʻynatilmasdan oldin chaqib olsa, ilon oʻynatuvchiga donishmandlikning nima foydasi bor?!

¹²Donolarning soʻzlari ularga hurmat keltiradi, nodonlarning soʻzlari esa oʻzlarini halok qiladi.

¹³Ularning soʻzlari ahmoqlik bilan boshlanib, gʻirt telbalik bilan tugaydi,

¹⁴shunda ham ahmoqlar gapiraveradilar. Hech kim nima boʻlishini bilmaydi, kim bizga kelajakni aytib bera oladi?!

¹⁵Nodonning harakatlari uni juda charchatadi, chunki u shunchalik ahmoqki, shaharga boradigan yoʻlni ham qayta topa olmaydi.

¹⁶Ey shohi yosh boʻlgan, hukmdorlari ertalabdan ziyofat qiladigan yurt, senga afsus — nadomatlar boʻlsin.

¹⁷Shohi asilzoda boʻlgan, hukmdorlari mayxoʻrlik uchun emas, kuch toʻplash uchun oʻz vaqtida ziyofat qiladigan yurt baxtlidir.

¹⁸Dangasalikdan uyning tomi choʻkadi, Yalqovlik tufayli tomdan chakki oʻtadi.

¹⁹Ziyofat berilganda koʻngil shodlikka toʻladi, Sharob insonni xushnud etadi. Lekin ikkalasi uchun ham pul kerak.

²⁰Hatto sirdosh doʻstlaring orasida ham shohni la’natlama, oʻz yotoqxonangda ham boylarni yomonlama. Yaxshi gapning ham, yomon gapning ham qanoti bordir. Osmondagi qush soʻzlaringni yetkazib borishi mumkin.