Read Uzbek Muqaddas Kitob Voiz 11 Bible Online

Voiz 11 - Uzbek Muqaddas Kitob bible

Voiz 11

¹Noningni suvga tashla, bir necha kundan keyin uni yana topasan.

²Bu dunyoda qanday kulfat kelishini bilmaysan, shuning uchun narsalaringni yetti, hatto sakkiz kishiga boʻlib bergin[31].

³Bulutlar toʻlganda, yerga yomgʻir yogʻadi, daraxt shimol tomonga yoki janub tomonga yiqilsa ham, oʻsha yiqilgan joyida yotaveradi.

⁴Shamolni koʻrib qoʻrqqan hech qachon urugʻ ekmaydi, yomgʻirdan xavfsirab, bulutni kuzatgan hech qachon hosil oʻrmaydi.

⁵Onaning bachadonidagi bolaga qanday qilib jon[32] kirishini bilmaganingdek, hamma narsani sodir qiladigan Xudoning ishlarini bilmaysan.

⁶Urugʻlaringni ertalab ekkin, kechqurun ham qoʻllaring boʻsh oʻtirmasin, chunki sen qaysi biri — unisimi yoki bunisimi yaxshi oʻsishini bilmaysan, balki ikkalasi ham yaxshi oʻsar.

⁷Yorugʻlik lazzatlidir, quyoshni koʻrish koʻzlar uchun ham yoqimlidir.

⁸Uzoq yillar yashaydiganlar ham har bir yashagan kunlaridan zavq olsin, hali koʻp qorongʻilik kunlari boʻlishini esda tutsin. Hamma keladigan narsalar yelday oʻtib ketadi[33].

⁹Ey yigit, yoshligingda rohatlan, yuraging seni zavqlantirsin. Koʻngling orzu qilgan, koʻzlaring xohlagan ishni qilgin, lekin bilib qoʻy, har bir qilgan ishing uchun Xudo seni hukm qiladi.

¹⁰Qaygʻurmagin, tanang ogʻriqni bilmasin, chunki yoshlik, hayot tongi yelday tez oʻtib ketadi.