Read Uzbek Muqaddas Kitob Voiz 12 Bible Online

Voiz 12 - Uzbek Muqaddas Kitob bible

Voiz 12

¹Yoshligingda, qaygʻuli kunlar kelishidan oldin Yaratganni yodda tut, shunday yillar keladiki, sen: “Bu vaqt menga hech qanday rohat keltirmaydi”, — deysan.

²Hayotingning oʻsha yillarida: Quyosh, yorugʻlik, oy va yulduzlar qorayar, Yomgʻirli bulutlar oʻtib ketmas.

³Seni himoya qilgan qoʻllaring qarilikdan qaltirar, Kuchli oyoqlaring zaiflashar, Tishlaring kamligidan chaynay olmassan, Koʻzlaring yaxshi koʻrmaydigan boʻlib qolar.

⁴Quloqlaring ham koʻchada bugʻdoy yanchilayotganiniyu Ashulachilar ovozini eshitolmaydigan darajada kar boʻlib qolar. Qushlarning ovozi esa seni uygʻotib yuborar.

⁵Balandliklardan qoʻrqadigan boʻlib qolarsan, Ehtiyotkorlik bilan qadam tashlarsan. Sochlaring gulga kirgan bodom daraxtiday oppoq boʻlib qolar, Turib yurishga qiynalarsan, Belingning quvvati ketib sudralib yurarsan. Har bir inson dunyodan oʻtganday, sen ham vafot etarsan, Azadorlar koʻchalarni toʻldirarlar.

⁶Kumush zanjir uzilar, Hayotning tilla chirogʻi tushib ketib, buzilar. Buloq boshidagi suv koʻzasi sinib ketar, Quduqning arqoni uzilib ketar.

⁷Sening oʻtkinchi tanang Yerning tuprogʻiga qaytar, Xudo bergan ruhing[34] ham Uning Oʻziga qaytar.

⁸“Behuda![35] Behuda! — deydi Voiz[36]. — Hammasi behudadir!”

⁹Voiz dono odam edi. U oʻz bilganlarini odamlarga oʻrgatdi, sabr — toqat bilan hikmatlarni oʻrganib, ularni toʻgʻrilab yozdi.

¹⁰Voiz ma’qul keladigan soʻzlar topishga harakat qilib, haqiqat soʻzlarini ochiq yozdi.

¹¹Donolarning hikmatlari oʻtkir tayoqqa oʻxshaydi, hikmatli soʻzlar mahkam qoqilgan mixlarga oʻxshaydi. Bularning hammasini barchamizning Choʻponimiz bergan.

¹²Bulardan boshqa nasihatlarga ehtiyotkorlik bilan qaragin, bolam[37]. Koʻp kitob yozishning oxiri yoʻq, Koʻp oʻqish odamni charchatadi.

¹³Hamma narsa aytildi, mana endi xulosa: Xudodan qoʻrq, Uning amrlarini bajar, chunki bu hammaning burchidir.

¹⁴Har bir ishni, hatto yashirin qilingan ishlarni ham, yaxshi yoki yomon boʻlishidan qat’iy nazar, Xudo hukm qiladi.