Read Uzbek Muqaddas Kitob Voiz 2 Bible Online

Voiz 2 - Uzbek Muqaddas Kitob bible

Voiz 2

¹Men, Voiz, oʻzimga: “Qani, rohatlanib, bir maza qilay — chi”, — dedim, lekin bu ham behuda[4] ekan.

²“Kulgi telbalik ekan, rohat qanday foyda keltiradi?” — dedim.

³Donolik meni boshqarar ekan, koʻnglimni sharob bilan chogʻ qilib koʻray — chi deb, ahmoqlikka oʻz bagʻrimni ochdim. Bu dunyoda odamlar oʻz qisqa hayotlari davomida qanday ish qilsalar ularga foyda kelishini bilmoqchi boʻldim.

⁴Buyuk ishlar qildim: oʻzimga uylar qurdim, uzumzorlar barpo qildim,

⁵polizlar va bogʻlar yaratdim, u yerlarga har xil mevali daraxtlar ekdim.

⁶Oʻsayotgan daraxtlarni sugʻorish uchun hovuzlar qazdirdim.

⁷Oʻzim uchun qullar va choʻrilar sotib oldim, uyimda qul — choʻrilar tugʻilib, ularning soni ortib boraverdi. Podalarim shunchalik koʻp ediki, Quddusda mendan oldin yashagan hech kimda bunchalik koʻp mol — qoʻy boʻlmagan.

⁸Oʻzim uchun kumushu oltin, shohlarga loyiq ajoyib boyliklardan yigʻdim, juda koʻp yerlarga ega boʻldim. Ayol va erkak qoʻshiqchilar menga xizmat qilishar edi, menga zavq keltiradigan haramim ham katta edi.

⁹Men buyuk boʻlib, buyuklikda Quddusda mendan oldin yashaganlarning hammasidan oʻtdim. Donoligim menga pand bermadi.

¹⁰Oʻzim xohlagan hamma narsani oldim, koʻnglim istaganini qildim. Qilgan har bir ishimdan jonim rohatlandi, bu qilgan mehnatlarim evaziga kelgan mukofot edi.

¹¹Ammo qarasam, oʻz qoʻllarim bilan qilgan ishlarim, qilgan hamma mehnatim — bularning hammasi behuda ekan, shamolning orqasidan quvishday ekan. Bu dunyoda birorta foydali narsa topilmasligini bildim.

¹²Shundan keyin yana donolik, telbalik va ahmoqlikni solishtirishga qaror qildim. Vorisim menikidan ham yaxshiroq xulosaga kela olarmidi?!

¹³Yorugʻlik qorongʻilikdan yaxshiroq boʻlganiday, donolik ham ahmoqlikdan yaxshiroqligini tushundim:

¹⁴Dononing koʻzi bor, Nodon esa qorongʻilikda yuradi. Ammo hammaning taqdiri bir[5] ekanligini ham tushundim.

¹⁵Oʻzimcha: “Nodonning boshiga tushgan narsa mening ham boshimga tushar ekan. Shunday ekan, dono boʻlishning nima foydasi bor?!” deb oʻyladim. “Bu ham behuda!” — dedim.

¹⁶Donolar ham, nodonlar unutilgani kabi, unutiladi, kelajakda hamma birday unutiladi. Nima uchun donolar nodonlarday oʻlishi kerak?!

¹⁷Shuning uchun ham men hayotdan nafratlandim, chunki bu dunyoda qilingan har bir ish menga qaygʻu keltirdi. Hammasi behuda, shamolning orqasidan quvishdaydir.

¹⁸Bu dunyoda mehnat qilib topgan hamma narsamdan nafratlandim, chunki hammasi baribir mendan keyin keladiganlarga qolishini bilardim.

¹⁹Ular dono boʻladimi yoki ahmoqmi, kim biladi? Men bu dunyoda mehnat qilib, donolik bilan topganlarimga baribir oʻshalar egalik qilishadi. Bu ham behudadir.

²⁰Shunda bu dunyoda qilgan barcha mehnatim uchun yuragim achib, qaygʻura boshladim.

²¹Axir, baribir donolik, bilim va mohirlik bilan topilgan narsalar mana shu narsalar uchun ishlamaganlarga qolar ekan. Bu ham behuda, qanday falokat!

²²Bu dunyoda qilgan mehnati va tirishqoqligi uchun odam qanday foyda olarkan — a?!

²³Axir, uning kunlari dardga toʻla boʻlsa, qaygʻudan boshi chiqmasa, hattoki kechalari ham dam ololmasa. Eh, bu ham behuda!

²⁴Odam uchun yeyish, ichish va qilgan mehnatidan rohatlanishdan yaxshiroq narsa yoʻq. Bu ham Xudodan ekanligini tushundim,

²⁵axir, Xudosiz kim ovqat yeya oladi, kim rohat topadi?!

²⁶Xudoga ma’qul boʻlganlarga Xudoning Oʻzi donolik, bilim va quvonch beradi. Gunohkorlarga esa boylik yigʻish ishtiyoqini beradi — yu, ularning ishlab topganlarini olib, Xudo Oʻziga ma’qul boʻlganlarga ato etadi. Gunohkorlarning bu ishlari ham behuda va shamolning orqasidan quvishdaydir.