Read Uzbek Muqaddas Kitob Voiz 3 Bible Online

Voiz 3 - Uzbek Muqaddas Kitob bible

Voiz 3

¹Bu dunyoda hamma narsaning oʻz tayinlangan payti bor, har bir ishning oʻz vaqti bor[6].

²Tugʻilishning ham, oʻlishning ham oʻz vaqti bor. Ekishning ham, ekilganni oʻrishning ham oʻz vaqti bor.

³Oʻldirishning ham, shifo berishning ham oʻz vaqti bor. Buzishning ham, qurishning ham oʻz vaqti bor.

⁴Yigʻlashning ham, kulishning ham oʻz vaqti bor. Azaning ham, raqsning ham oʻz vaqti bor.

⁵Tosh otishning ham, tosh yigʻishning ham oʻz vaqti bor. Bagʻriga bosishning ham, undan oʻzini tiyishning ham oʻz vaqti bor.

⁶Qidirishning ham, yoʻqotishning ham oʻz vaqti bor. Saqlab qoʻyishning ham, tashlab yuborishning ham oʻz vaqti bor.

⁷Yirtishning ham, tikishning ham oʻz vaqti bor. Sukut saqlashning ham, soʻzlashning ham oʻz vaqti bor.

⁸Yaxshi koʻrishning ham, nafratning ham oʻz vaqti bor. Urushning ham, tinchlikning ham oʻz vaqti bor.

⁹Shuncha mehnat qilib inson qanday foyda topadi?

¹⁰Insonlar qilishi uchun Xudo bergan mushkul ishni koʻrdim.

¹¹Xudo aytgani boʻyicha hamma narsa oʻz vaqtida sodir boʻladi. Xudo yuragiga solgani uchun inson vaqt oʻtishini sezadi, lekin Xudo boshidan oxirigacha qilgan ishlarni inson tushuna olmaydi.

¹²Inson uchun baxtli hayot kechirish, oʻz hayotidan rohatlanishdan boshqa yaxshiroq narsa yoʻq ekanligini tushunib yetdim.

¹³Hamma yeb, ichib, oʻz qilgan mehnatining rohatini koʻrsin. Bu Xudoning in’omidir.

¹⁴Xudo qilgan har bir ish to abad oʻzgarmas, bu ishga hech narsa qoʻshib boʻlmaydi, undan hech narsani ayirib boʻlmaydi. Xudo bu ishlarni, hamma Mendan qoʻrqsin, deb qildi.

¹⁵Hozir nima boʻlsa, oldin ham boʻlgan, kelajakda boʻladigani hozir ham bordir. Oʻz vaqtida Xudo oʻtmishni yana qaytarar.

¹⁶Men yana bu dunyoda adolat hukm surishi kerak boʻlgan joyda — qozixonada ham, toʻgʻrilik oʻrnida ham egrilik koʻrdim.

¹⁷Oʻzimga: “Yaxshini ham, yomonni ham Xudo hukm qiladi, chunki Xudoning Oʻzi har bir narsaning, har bir ishning vaqtini belgilagan”, dedim.

¹⁸Men yana odamzod haqida shuni tushundim: “Insonlar ham xuddi hayvonlarday ekan. Shuni koʻrsatish uchun Xudo insonlarni sinar ekan.”

¹⁹Axir, odamlar bilan hayvonlarning taqdiri bir xil, unisi ham bunisi ham oʻladi. Insonlarga ham, hayvonlarga ham Xudo jon[7] bergan, odamlar hayvonlardan ustun emas. Hammasi behuda[8] ekan.

²⁰Hamma bitta joyga boradi, tuproqdan yaralganlar tuproqqa qaytadi.

²¹Insonning ruhi tepaga chiqadimi, hayvonlarning ruhi[9] pastga — yerning ostiga tushadimi, kim biladi?!

²²Shunda men tushundim: inson uchun oʻz mehnatidan rohat olishdan boshqa yaxshiroq narsa yoʻq ekan, chunki bu uning taqdiri. Inson oʻtib ketgandan keyin nima boʻlishini kim unga koʻrsata oladi?!