Read Uzbek Muqaddas Kitob Voiz 5 Bible Online

Voiz 5 - Uzbek Muqaddas Kitob bible

Voiz 5

¹Hech qachon gapirishga shoshilma, qalbingda Xudoga va’da berishga xovliqma. Xudo samoda, sen esa yerdasan, shuning uchun kamgap boʻlgin.

²Tashvish koʻp boʻlganda, puch niyatlar ham koʻpayadi, Koʻp gapirganda, ogʻizdan ahmoqona soʻzlar chiqadi.

³Xudoga nazr ataganingdan keyin uni bajarishni orqaga surmagin. U nodonlarni yoqtirmaydi. Albatta va’dangda turgin.

⁴Va’da berib, uni bajarmaslikdan koʻra, umuman va’da bermaslik yaxshiroqdir.

⁵Shunday paytda tiling seni gunohga yetaklamasin. Ruhoniyga[13]: “Nazr atab, xato qildim”, deb aytmagin. Shunday deb Xudoning qahrini keltirsang, oʻz qoʻllaring bilan qilgan ishlaringni Xudo buzib tashlashi mumkin.

⁶Puch niyatlaru koʻp gapirish behuda[14] oqibatlarga olib boradi. Shunday qilish oʻrniga Xudodan qoʻrqqin.

⁷Agar kambagʻallarga zulm qilinayotganini, adolat va haqiqat yoʻqligini koʻrsang, hayron boʻlmagin, har bir amaldorning ustidan undan ham kattarogʻi bor, ularning ustidan yana ham kattarogʻi bordir.

⁸Hammasi, hatto shoh ham, dalaning hosiliga koʻz tikib, ulush talab qilib oladi.

⁹Pulga ruju qoʻygan hech qachon pulga, boylikni yaxshi koʻrgan esa boylikka toʻymaydi. Bu ham behudadir.

¹⁰Buyum, narsalar koʻpayganda, ularni ishlatib yuboradiganlar ham koʻpayadi. Boylikning egasi faqat oʻz boyligiga termulib qarashdan boshqa yana qanday foyda topadi?!

¹¹Mehnatkashlar kam yesa ham, koʻp yesa ham tinch uxlaydi, boylar esa boyligi koʻpligidan xavotirlanib uxlay olmaydi.

¹²Bu dunyoda shunday bir qaygʻuli fojia koʻrdim: yigʻilgan boylik egasiga zarar keltiradi,

¹³ya’ni oʻsha boylik qandaydir omadsizlik tufayli yoʻqoladi. Oʻz bolalariga qoldirish uchun esa boy odamning hech narsasi boʻlmaydi.

¹⁴Onadan qanday tugʻilgan boʻlsa, shundayligicha bu dunyodan ketadi, qilgan mehnatlarining mevalaridan birortasini qoʻllarida olib keta olmaydi.

¹⁵Bu ham qaygʻuli fojiadir: inson qanday kelgan boʻlsa, shundayligicha ketadi, shamol uchun mehnat qilib qanday foyda topadi?

¹⁶Butun umrini qorongʻilikda oʻtkazadi, qaygʻu — alam, gʻazab va xastaliklar bilan yashaydi.

¹⁷Mana, men bir narsani tushundim: inson uchun Xudo bergan qisqa umri davomida yeyish, ichish va bu dunyoda qilgan oʻz mehnatidan zavqlanish yaxshi ekan, chunki bu insonning taqdiridir.

¹⁸Xudo kimga boylik va mulk berib, unga mana shu narsalardan rohatlanishga imkoniyat ham bersa, insonga oʻz qilgan mehnatidan mamnun boʻlib, undan zavqlanishiga yoʻl bersa, mana shu Xudoning in’omidir.

¹⁹Bunday inson hayoti haqida qaygʻurmaydi ham, chunki Xudo uning qalbini zavqlanish bilan band qiladi.