Read Uzbek Muqaddas Kitob Qo‘shiq 4 Bible Online

Qo‘shiq 4 - Uzbek Muqaddas Kitob bible

Qo‘shiq 4

¹Qanday goʻzalsan, ey sevgilim, Qanchalik goʻzalsan! Chachvoning ortidagi koʻzlaring Kabutarlarday muloyimdir. Gilad qirlaridan yoyilib tushayotgan Qop — qora qoʻylardaydir sening sochlaring.

²Yuvib — taralgan, juni qirqiladigan, Oppoq echkilardaydir sening tishlaring. Har birining egizi bor, Oʻrni hech boʻsh qolmagan.

³Lablaring qirmizi gʻunchalardaydir, Ogʻzing ham juda goʻzal. Chachvoning ortidagi yonoqlaring esa Anorlarday qip — qizil.

⁴Boʻyning tik qurilgan Dovud minorasiday, Marjonlaring tizim — tizim, Jangchilarning minglarcha qalqonlaridaydir.

⁵Koʻkraklaring egizak kiyiklardaydir. Ha, nilufarlar orasida oʻtlaydigan Ikki kiyikdaydir ular.

⁶Qorongʻilik chekinmasdan oldin, Tong otmay turib, Oʻsha xushboʻy mirra[16] togʻiga, Ziravorlar qiriga chiqaman.

⁷Har jihatdan goʻzaldirsan, sevgilim, Senda hech qanday nuqson yoʻq.

⁸Kela qol, kelinchagim, Lubnondan menga kel. Emona va Sanir togʻlaridan, Xermon togʻlariyu[17] sherlar makonidan, Qoplonlarning maskanidan tush.

⁹Ey jonim, kelinchagim, Qalbimni asir qilding. Koʻzlaringning nigohi bilan, Boʻyningdagi marjoning bilan Qalbimni asir qilding.

¹⁰Sevging qanday shirindir, Ey jonim, kelinchagim. Sening sevging sharobdan ham yaxshiroqdir. Atir moylaring esa Har qanday ziravordan ham xushboʻyroqdir.

¹¹Kelinchagim, lablaringdan bol tomar. Asal va sut tiling ostida, Kiyimlaring hidi Lubnon hidiga oʻxshar.

¹²Jonim mening, kelinchagim. Qulflangan bogʻ, devor bilan oʻralgan buloqdaysan, Yopib qoʻyilgan chashmadaysan sen.

¹³A’lo mevalar beradigan Anor bogʻiga oʻxshaysan. Bu bogʻda xina va sunbullar oʻsadi.

¹⁴Ha, bu bogʻda sunbulu za’faron, Xushboʻy qamish va dolchin, Har xil xushboʻy daraxtlar, Mirra va aloe, Eng a’lo ziravorlar oʻsadi.

¹⁵Sevgilim, sen bogʻdagi chashmaga, Hayotbaxsh suv bulogʻiga oʻxshaysan. Lubnon togʻlarining oqar suvlaridaysan.

¹⁶Ey shimol shabadasi, qoʻzgʻal, Janub shamoli, kelgin! Bogʻimda esgin, Toki bogʻimning xushboʻy hidlari Hamma joyga taralsin. Sevgilim oʻz bogʻiga kelib, A’lo mevalaridan yesin.