Read Uzbek Muqaddas Kitob Qo‘shiq 5 Bible Online

Qo‘shiq 5 - Uzbek Muqaddas Kitob bible

Qo‘shiq 5

¹Ey jonim, kelinchagim, bogʻimga kelib, Mirra[18] va ziravorlarimni toʻplayman. Asalari mumini hamda asalimni yeyman, Sut va sharobimni ichaman. Toʻyguningcha yegin, sevgilim, Sevgidan ichib, qoniqqin.

²Uxladim, lekin yuragim uygʻoq edi. Ana, sevgilim chaqirmoqda: “Ochgin eshigingni, jonim, sevgilim, Kabutarim, komilim. Boshim hoʻldir shudringdan, Sochlarim esa tun shabnamidan.”

³Kiyimlarimni yechib qoʻyganman, Qanday qilib yana kiyaman?! Oyoqlarim yuvilgan, Ularni kir qilaymi?!

⁴Sevgilim qoʻlini eshik teshigidan kirgizganda, Butun vujudim titrab ketdi.

⁵Sevgilimni kirgizay, deya turdim. Qoʻllarimdagi mirra, Eshikning tutqichlariga oqib tushdi.

⁶Sevgilimga eshikni ochdim, Lekin u ketib qolibdi. U ketganiga yurak — bagʻrim ezildi[19]. Qidirib, uni topa olmadim, Chaqirdim, lekin u javob bermadi.

⁷Shaharni aylanib yurgan qoʻriqchilar Meni koʻrib qoldilar. Ular meni urib yaraladilar. Oʻsha shahar qoʻriqchilari Ustimdagi roʻmolimni olib qoʻydilar.

⁸Ey Quddus qizlari, va’da beringlar, Sevgilimni topsangiz, aytib qoʻyinglar, Uning ishqi dardida yonmoqdaman.

⁹Ey ayollar goʻzali, Sevgilingning boshqalardan nimasi ortiq?! Uning boshqalardan nimasi ortiqki, Sen bizga, va’da beringlar, deb aytasan?!

¹⁰Sevgilim koʻhlik, chiroylidir, Oʻn mingtaning ichida ajralib turar.

¹¹Boshi eng a’lo tilladay goʻzal, Jingalak sochlari qargʻaday qop — qoradir.

¹²Koʻzlari esa buloqlar boʻyidagi kabutarlarday, Chashmalar boʻyidagi, sutga choʻmdirilgan kaptarlardaydir.

¹³Uning yonoqlari muattar hidli Ziravor bogʻlari kabi juda xushboʻydir. Lablari esa mirra oqib turgan Nilufarlar kabi shirindir.

¹⁴Qoʻllari tilladan yasalib, Topaz toshlar bilan bezatilganga oʻxshaydi. Tanasi esa zangori yoqutlar oʻrnatilgan Tep — tekis fil suyagiday chiroylidir.

¹⁵Oyoqlari tilla taglikka oʻrnatilgan Marmar ustunlari kabi kuchlidir. Uning qiyofasi ulugʻvor Lubnonday, Qudratli, a’lo sadr daraxtlaridaydir.

¹⁶Uning ovozi juda shirin, Oʻzi esa har jihatdan maftunkor. Ey Quddus qizlari, mana shunday yigit Mening sevgilim, doʻstimdir.