Read Uzbek Muqaddas Kitob Qo‘shiq 7 Bible Online

Qo‘shiq 7 - Uzbek Muqaddas Kitob bible

Qo‘shiq 7

¹Qaytgin, qaytib kelgin, ey Shulamlik[21] qiz! Qaytib kel, seni yana bir bor koʻraylik. Nima uchun bu Shulamlik qizga qaraysizlar?! U ikki qator qizlar orasida raqsga tushyaptimi?!

²Ey malikaga oʻxshagan qiz! Kafsh kiygan oyoqlaring qanday chiroyli! Doʻmboq sonlaring javohirlarday, Xuddi mohir ustaning qoʻli bilan ishlanganday!

³Doimo xushboʻy sharobga toʻla boʻlgan, Dum — dumaloq kosadaydir sening kindiging. Yumaloq qorning esa nilufarlar bilan oʻralgan, Tillarang bugʻdoy uyumi kabidir.

⁴Koʻkraklaring egizak kiyiklardaydir.

⁵Fil suyagidan qurilgan minoraday goʻzaldir boʻyning, Batrabim darvozasi yonidagi Xashbon[22] buloqlariday yorqindir koʻzlaring. Burning esa Damashq shahriga qaragan Lubnon minorasiday tekisdir.

⁶Boshing Karmil togʻiday[23] baland turadi, Soching kimxobday goʻzal, Hatto shoh ham unga asirdir.

⁷Qanday goʻzal va xushroʻysan, Huzurbaxsh sevgilim mening.

⁸Palma daraxtiday savlatlisan, Koʻkraklaring uning mevalariday toʻliqdir.

⁹Men shunday dedim: “Palma daraxtiga chiqib, Mevalaridan ushlayman.” Koʻkraklaring men uchun uzumday mazali, Nafasing esa olmalarday shirin boʻlsin.

¹⁰Oʻpichlaring eng a’lo sharobday shirindir, Bunday sharob lab va tishlar orasidan tekis oʻtadi[24].

¹¹Men sevgilimnikiman, U faqat meni qoʻmsaydi.

¹²Kelgin, sevgilim, dalalarga boraylik. Xina gullari orasida[25] yotib qolaylik.

¹³Vaqtli turib, uzumzorlarga kiraylik. Ular gulga kirdimikin?! Toklaru anorlar gullaganmikin?! Oʻsha yerda men senga oʻz sevgimni toʻla koʻrsataman.

¹⁴Mehrigiyolar[26] hid taratib turibdi. Eshigimiz tepasiga har xil mevalardan osib, Sen uchun saqlab qoʻydim, sevgilim.