Read Uzbek Muqaddas Kitob Ishayo 1 Bible Online

Ishayo 1 - Uzbek Muqaddas Kitob bible

Ishayo 1

¹Omiz oʻgʻli Ishayoning Yahudo[1] hamda Quddusga oid bashorati. Bu davrlarda Yahudoda Uzziyo, Yoʻtom, Oxoz va Hizqiyo kabi shohlar hukmronlik qilardi[2].

²Eshiting, ey samolar, tingla, ey zamin, Shudir Egamizning kalomi: “Bino qildim bolalarni[3], ulgʻaytirdim ularni, Ammo ular isyon qildilar Menga.

³Hoʻkiz biladi oʻz egasini, Hatto eshak bilar kim uni boqishini, Ammo xalqim Isroil bilmaydi, Ular tushunmaydi Men, oʻz Egasini.”

⁴Eh, gunohkor elat, aybi muqarrar xalq, Eh, qabih nasllar! Nomussizlarcha ish qilar bu bolalar, Eh, Egamizni tark etgan ular, Isroil xalqining Muqaddas Xudosiga Shakkoklik qilgan, Egamizga orqa oʻgirgan ular!

⁵Egam aytar: “Nega yana muncha kaltak istaysiz?! Ne uchun isyonni davom ettirasiz?! Yaralangan butun bosh, Madordan ketgan butun yurak.

⁶Boshdan — oyoq sogʻ joyi yoʻq, Yiring ila qoplangan, koʻkarib ketgan, Yaralaridan qon oqib yotar, Tozalanmagan, bogʻlanmagan, moy surtilmagan[4].

⁷Vayronalar ichra yotar yurtingiz, Olovda yonib ketgan shaharlaringiz! Oldingizda yeringizni Yeb bitirar kelgindilar, Begonalar yurtingizni vayron qilar[5].

⁸Ammo aziz Quddus[6] Qamal qilinganday boʻlar, U oʻxshab qolar Uzumzordagi yolgʻiz chaylaga, Polizda tikkaygan kapaga.”

⁹Agarda Sarvari Olam Qoldirmaganda edi besh — oltitamizni, Sadoʻm shahrining holiga tushar edik, Gʻamoʻra shahriday[7] xonavayron boʻlardik.

¹⁰Egamizning kalomini eshiting, Sadoʻm yoʻlboshchilarining izdoshlari! Xudoyimizning oʻgitiga quloq soling, Gʻamoʻra xalqining sheriklari!

¹¹“Nima keragi bor Menga?! Koʻplab qurbonligingiz?! Toʻyib ketdim endi Kuydirilgan qoʻchqorlar nazridan, Boʻrdoqi yogʻlaridan, — deb aytmoqda Egamiz. — Menga xush kelmadi buqalarning, Qoʻzilar va echkilarning qoni.

¹²Huzurimda hozir boʻlganingizda, Muqaddas Hovlimni bulgʻasin, deb kim aytdi? Bularni sizlardan kim soʻradi?!

¹³Endi soxta nazrlar qilmanglar Menga, Tutatqingiz ham Menga jirkanchdir! Toqat qilmasman endi Chorlovlaringizga, fosiq yigʻiningizga, Yangi oy shodiyonasiyu Shabbat kuningizga.

¹⁴Nafratlandim yangi oy shodiyonangizdan Hamda «muqaddas» kunlaringizdan. Bular Menga ogʻir yuk boʻldi, Toliqqanman bularni koʻtarishdan.

¹⁵Hatto koʻp ibodat qilganingizda ham, Eshitmasman Men sizlarni. Menga ochganingizda qoʻllaringizni, Sizlardan yashiraman Men koʻzlarimni. Qoʻllaringiz qonga botgandir.

¹⁶Poklang, tozalang oʻzingizni. Koʻz oldimdan yoʻqoting Qabih qilmishlaringizni. Qabihlikni endi bas qiling!

¹⁷Oʻrganing ezgulik qilishni, Adolatni izlang, Yoʻlga soling zolimni[8], Himoya qiling yetimni, Beva haqi uchun kurashing.”

¹⁸Egamizning kalomi shudir: “Qani, endi birgalashib oʻylaylik: Gunohlaringiz qizil rangga oʻxshasa ham, Sizlar qorday oppoq boʻlasiz. Gunohlaringiz qirmizi rangga oʻxshasa ham, Sizlar momiqday oppoq boʻlasiz.

¹⁹Agar Menga itoat etsangiz chin koʻngildan, Yeysiz, albatta zaminning sara hosilidan.

²⁰Ammo rad etib, Menga boʻysunmasangiz, Qilichning damiga roʻpara boʻlgaysiz.” Egamizning Oʻzi shunday deb aytdi.

²¹Ey Quddus! Qayerga gʻoyib boʻldi sening sadoqating?! Qanday qilib fohishaga sen aylanding?! Axir, oldinlari xalqing solihlikka, adolatga tashna edi! Endi esa shahringda faqat qotillar qoldi!

²²Sening kumushing toshqol[9] boʻldi, Sharobing suv bilan aralashdi.

²³Ha, isyonkordir yoʻlboshchilaring, Oʻgʻrilarga sherikdir ular. Har biri porani sevar, Hadyaning ortidan quvar. Yetimni ular himoya qilmas, Bevaning arzi ularga yetib bormas.

²⁴Endi Isroil xalqining qudratli Xudosi, Sarvari Olam — Rabbiy aytadi: “Ha, dushmanlarimga gʻazabimni socharman, Gʻanimlarimdan oʻch olib, tasalli toparman.

²⁵Yana sizlarga qarshi qoʻl koʻtaraman. Ishqor bilan tozalaganday, Jamiki qorishmani yoʻq qilib, Toshqollarni ajrataman.

²⁶Azalda boʻlganiday Odil hakamu maslahatchilarni beraman. Shundan soʻng senga nom qoʻyilar: «Solihlik shahri, Sadoqat shahri», deya.”

²⁷Shunda Quddus adolat orqali qutqariladi, Tavba qilganlar solihlik tufayli najot topadi.

²⁸Isyonkoru gunohkorlar birga qiriladi, Egamizdan voz kechganlar halok boʻladi.

²⁹Sizlar sharmanda boʻlasiz Oʻzingiz xush koʻrgan emanlar sababli. Mana, uyalib qolasiz Oʻzingiz tanlagan sajdagoh bogʻlar[10] tufayli.

³⁰Ha, sizlar oʻxshab qolasiz Yaprogʻi qovjiragan emanga, Hamda suvsiz qaqragan boqqa.

³¹Kuchlilar ham choʻpga oʻxshab qoladi. Ishlari lov etgan olovga oʻxshaydi. Oʻzlariyu ishlari birga yonib ketadi, Hech kim bu olovni oʻchirolmaydi.