Read Uzbek Muqaddas Kitob Ishayo 10 Bible Online

Ishayo 10 - Uzbek Muqaddas Kitob bible

Ishayo 10

¹Ey siz, yovuz farmonlar chiqaradiganlar, Qonunlar yozib, jabr keltiradiganlar.

²Kambagʻalni adolatdan mahrum qilyapsiz, Mazlum xalqimni talayapsiz, Ovingiz boʻlayotir bevalar, Oʻljangiz boʻlayotir yetimlar.

³Qiyomat kuni kelganda, siz nima qilasiz? Uzoqdan balo kelganda, nima qilasiz? Yordam soʻrab kimga qochib borasiz?! Boyligingizni qayerga olib ketasiz?!

⁴Yoʻq, asir boʻlib yiqilib qolasiz, Yo jasadlar tagida qolib ketasiz. Ammo shunday boʻlsa ham, Egam tushmas gʻazabidan, Uning qoʻli hamon Isroilga qarshi koʻtarilgan.

⁵Egam aytar: “Mana Ossuriya![59] Gʻazabimning hassasi! Uning qoʻlidadir qahrimning tayogʻi!

⁶Men uni shakkok elga qarshi yuboraman, Gʻazabimni oʻsha xalqqa qarshi sochaman, Ovlab, oʻlja qil, deb unga amr qilaman. Xalqlarni loyday oyoq osti qiladi u.

⁷Ammo Ossuriya Mening qurolim ekanini Xayoliga ham keltirmas, Bular haqida u oʻylamas ham. Uning fikri — yodi: Xalqlarni qirib tashlashdir, Bitta qoʻymay ularni yoʻq qilishdir.

⁸Ossuriya shohi shunday oʻylaydi: «Lashkarboshilarim shohlar emasmi?!

⁹Xalno shahrini Karxamish shahriday vayron qilmadikmi?! Xomat ham Arpadday[60] quladi — ku! Samariya Damashq[61] kabi emasmi?!

¹⁰Olganimday behuda butlar shohliklarini, Olaman Quddusu Samariyaning sanamlarini.

¹¹Ne qilgan boʻlsam Samariya va uning sanamlarini, Shunday qilaman Quddusu uning butlarini.»”

¹²Ammo Rabbiy tuzgan rejalarini Sion togʻida va Quddusda amalga oshirgandan keyin, shunday deydi: “Endi takabbur, kibor Ossuriya shohi bilan hisob — kitob qilaman.

¹³Axir, Ossuriya shohi shunday degan edi: «Oʻz kuchim bilan bularni amalga oshirdim, Donoligim bilan qildim, axir, idrokliman. Xalqlarning chegarasini yoʻq qildim, Ularning xazinalarini oʻlja qilib oldim. Qudratli shohlarini taxtdan uloqtirdim.

¹⁴Qush iniga qoʻl suqib tuxum yiqqani kabi, Xalqlarning boyliklarini toʻpladim. Tashlab ketilgan tuxumlarni qanday toʻplasalar, Jamiki yurtlarni men shunday yigʻib oldim. Yo qanot qoqqan, ogʻzin ochgan, Yo ovozin chiqargan birov boʻlmadi.»”

¹⁵Bolta maqtanarmi uni ishlatganga?! Arra oʻzini maqtaydimi uni qoʻlga olganga?! Kaltak ushlaganni kaltakning oʻzi koʻtaradimi?! Hassa oʻzini ushlaganni koʻtaradimi?!

¹⁶Ey Ossuriya, Shu bois Sarvari Olam — Rabbiy Ogʻir xastalikni yuborar pahlavonlaringiz orasiga. Kasalliklarining qizgʻin pallasida Ularning badanlaridan oʻt chiqadi, Ular goʻyo lov — lov etib yonadi.

¹⁷Isroilning Nuri yolqin boʻladi, Isroil xalqining Muqaddas Xudosi olov boʻladi. Olov yondirib, tikanzoru changalzorlarini Bir kunda yamlab yutadi.

¹⁸Ossuriyaning muhtasham oʻrmonlari Va unumdor dalalari Ogʻir xastalikka yoʻliqqan insonday, Tamomila xarob boʻladi.

¹⁹Oʻrmondagi daraxtlar shunchalik oz qolarki, Hattoki yosh bola ham ularni sanay oladi.

²⁰Oʻsha kuni Isroilning qolgan — qutgani, Yoqub naslining qutulganlari Boshqa suyanmaydi oʻz zulmkorlariga[62], Ular sadoqat bilan tayanadi Isroil xalqining Muqaddas Xudosi — Egamga.

²¹Yoqub naslining qutulganlari, omon qolganlari Qaytadi[63] qudratli Xudoga.

²²Ey Isroil, sening xalqing Dengiz qumiday koʻp boʻlsa ham, Endi ulardan faqatgina sanoqli odamlar qaytadi. Zero, “Qirgʻin boʻlsin”, deya qaror qilingan, Xudo odil hukmini Oʻz xalqining boshiga soladi.

²³Shubhasiz, butun yer yuzida qiyomat boʻladi, zotan, Sarvari Olam — Rabbiy shunday qaror qilgan.

²⁴Shu bois Sarvari Olam — Rabbiy shunday aytmoqda: “Ey xalqim, Quddus[64] ahli! Misrliklar kabi, Ossuriyaliklar sizlarga tayoq koʻtaradilar, sizlarni qamchi bilan uradilar. Ammo hademay gʻazabimni bosaman, ulardan qoʻrqmanglar. Endi Ossuriyaliklarga qahrimni sochib, ularni qiraman.

²⁶Ha, Midiyonlarni Oriv qoyasida shunday qirgan edim[65]. Hassamni koʻtarib, Misr lashkarini dengizda gʻarq qildim[66]. Endi xuddi shunday qilib, Men, Sarvari Olam, ularga qarshi qamchimni koʻtaraman.

²⁷Oʻsha kuni Ossuriyaning yukini yelkangizdan uloqtiraman. Uning boʻyinturugʻi boʻyningizdan olib tashlanadi. Ha, boʻyinturuq yoʻq qilinadi, chunki sizlar kuchga toʻldingiz[67].”

²⁸Ossuriya lashkari Oyaz shahriga[68] keldi, Migron boʻylab oʻtdi, Qurol — aslahasini Mixmashda shay qildi.

²⁹Ular Gebo soʻqmogʻini kesib oʻtdilar — u, Rama xalqi vahimaga tushib qoldi, Ular Shoulning shahri Givoda omonat toʻxtadi — yu, Shahar ahli qochib ketdi.

³⁰Faryod qiling, ey Galim ahli! Eshit, ey Laysho! Ey shoʻrlik Onotoʻt!

³¹Madmenax ahli qochib ketdi, Gebim ahli, panoh topay deb, uchib ketdi.

³²Oʻsha kuni Ossuriya lashkari Nav shahrida turadi. Quddus shahri joylashgan tepalikka — Aziz Sion togʻiga qarab mushtini koʻtaradi.

³³Qara, Sarvari Olam — Rabbiy Qudratli kuchi ila daraxt shoxlarini kesib tashlaydi, Baland daraxtlarni qirqib tashlaydi, Yuksalganlarini yerga uradi.

³⁴U bolta bilan kesib tashlaydi oʻrmondagi changalzorni, Qudratli Xudo qulatib yuboradi Lubnon daraxtlarini.