Read Uzbek Muqaddas Kitob Ishayo 13 Bible Online

Ishayo 13 - Uzbek Muqaddas Kitob bible

Ishayo 13

¹Omiz oʻgʻli Ishayoga vahiyda Bobil toʻgʻrisida ayon boʻlgan bashorat.

²Yalang tepalik uzra bayroq koʻtaring, Bobilga qarshi jangchilarni safarbar qiling. Hammasini jangga da’vat eting, Ular aslzodalar darvozalarini ishgʻol qilsin.

³Egam aytar: “Men Oʻzim tanlaganlarga amr berib, Qahrimni koʻrsatsin deb, jangchilarimni yigʻdim, Gʻalabamdan sevinadiganlarni toʻpladim.”

⁴Qirlardagi olomonning tovushi Oʻxshaydi buyuk xalqning ovoziga. Ana, shohliklarning shovqin — suroni! Elatlar yigʻilmoqda. Jang qilmoqqa lashkarini Sarvari Olam tayyorlamoqda.

⁵Kelayotir ular uzoq yerlardan, Ha, osmon gumbazining bir burchidan. Egam va Uning gʻazab qurollari Vayron qiladi butun yer yuzini.

⁶Faryod qil, Egamizning kuni[85] yaqin! Ha, Qodir Xudo kulfat yuboradi!

⁷Hamma qoʻllardan darmon ketadi, Har bir inson vahimaga tushadi.

⁸Ular dahshatga tusharlar, Dardu iztirob ularni chulgʻar, Toʻlgʻoq tutgan ayolday bukchayib qolar. Bir — biriga qoʻrquv ichra qarar, Ularning yuzlari lovullab yonar.

⁹Mana, kelayotir Egamizning kuni! Alanga olayotir gʻazabu qahr, dahshat. Vayronaga aylantirar yer yuzini, Yer yuzidan qirib tashlar gunohkorlarni.

¹⁰Ha, samodagi yulduzlar, burjlar Taratmaydi oʻz yorugʻligini. Quyosh chiqsa ham, zulmat boʻladi, Oy oʻz nurini sochmaydi.

¹¹Egam aytar: “Olam bilan hisob — kitob qilaman qabihligi uchun, Fosiqlar bilan ularning gunohi uchun, Manmanlarning kiborligiga chek qoʻyaman, Takabburlarni dimogʻdorligi uchun yerga uraman.

¹²Insonni kamyob qilarman sof oltindan ham, Odamni Ofir oltinidan ham.

¹³Gʻazabim alangalangan kun Samoni titratib yuborarman. Men, Sarvari Olamning gʻazabidan Zamin qoʻzgʻaladi oʻz oʻrnidan.

¹⁴Shunda inson ovdagi jayronday boʻlar, Choʻponsiz qolgan suruvday boʻlar, Har biri oʻz xalqiga qaytib ketadi, Har biri oʻz yurtiga qochib boradi.

¹⁵Topilganlarning har biri nayzaga ilinadi, Qoʻlga tushgan har kim qilichdan oʻtkaziladi.

¹⁶Oʻzlarining koʻz oʻngida Chaqaloqlari tilka — pora boʻladi. Uylari talon — taroj boʻladi, Xotinlariga tajovuz qilinadi.

¹⁷Mana, Midiyaliklarni[86] ularga qarshi qoʻyaman, Midiyaliklarga kumushning hech keragi yoʻq, Ular oltinni ham istamaslar.

¹⁸Ularning oʻqlari yoshlarni qiradi, Shafqat koʻrsatmaydi ular bolalarga, Rahm qilmaydi ona qornidagilarga.

¹⁹Bobil shahri shohliklarning goʻzali, Bobildir — Bobilliklarning[87] ulugʻvor durdonasi. Ammo Men, Xudo, yer bilan yakson qilaman Xuddi Sadoʻm, Gʻamoʻra[88] kabi uni.

²⁰Endi u yerda hech kim yashamas, To abad hech kim uni maskan qilmas. U yerda hatto chodir qurilmas, Choʻponlar suruvlarini oʻtlatmas.

²¹Ammo yovvoyi hayvonlar bu yerda yotar, Uylar yirtqichlar bilan toʻlar, U yerda boyqushlar joylashar, Echkilar u yerda shataloq otar.

²²Uvullashar sirtlonlar qal’alarda, Chiyaboʻrilar goʻzal saroylarda. Oʻsha vaqt yaqin orada keladi, Oʻsha kun kelmasdan qolmaydi.”