Read Uzbek Muqaddas Kitob Ishayo 14 Bible Online

Ishayo 14 - Uzbek Muqaddas Kitob bible

Ishayo 14

¹Ammo Yoqub nasliga Egam shafqat qiladi, U yana Isroil xalqini tanlab oladi. Yoqub nasliga oʻz yerida orom beradi, Birlashadi musofirlar ular bilan, Qoʻshiladi Yoqub xonadoni bilan.

²Xalqlar oʻz yurtlariga Isroilni boshlab boradi, Ular Isroil xalqining mulki boʻladi. Isroil Egamning yerida xalqlarni qul, choʻri qiladi. Oʻzini asir qilganlarni Isroil xalqi asir qiladi, Zolimlar ustidan u hukmronlik qiladi.

³Egam sizni qaygʻu, dard — alamdan qutqarganda, sizga azob bergan ogʻir ishdan xalos qilganda,

⁴Bobil shohini masxaralab bu soʻzlarni aytasiz: “Mana, zolimning kuni bitdi — ya! Zoʻravon[89] tamom boʻldi — ya!

⁵Egam sindirdi fosiqlarning tayogʻini, Hukmdorlarning hassasini!

⁶Bu hassa xalqlarni rosa urardi, Toʻxtovsiz kaltaklardi, Xalqlarga gʻazab ila hukmronlik qilardi, Shafqat qilmay ta’qib qilardi.

⁷Jamiki zamin tinch, osuda, Ular sevinch ila qoʻshiq aytmoqda.

⁸Hatto sarv daraxtlari halokatingdan mamnun, Lubnon sadrlari ham aytar: «Endi sen chuqurda yotibsan, Hech kim bizni kesgani kelmas.»

⁹Oʻliklar diyori[90] jonlanib qoldi: Ana, keldi, kutib olaylik, deya. Qara, uygʻondi seni deb Yer yuzi yoʻlboshchilarining ruhlari. Taxtlaridan oyoqqa qalqidi Jamiki xalqlarning shohlari.

¹⁰Ey Bobil shohi! Hammalari senga qarab aytadi: «Hatto sen ham bizday nochor boʻlding — a, Bizning kunimiz tushdi sening boshingga.»

¹¹Ulugʻvorliging, kayfu safolar tovushi Uloqtirildi oʻliklar diyoriga! Ostingdagi qurtlar koʻrpachangdir, Chuvalchanglar sening toʻshagingdir.

¹²Qanday qilib tushib ketding samodan, Ey Zuhra yulduz, Tong oʻgʻli?! Xalqlarni yerga uloqtirgan eding! Yerga qulab tushding — ku oʻzing!

¹³Ha, oʻzingcha aytgan eding: «Men chiqib boraman samolarga, Taxtimni koʻtaraman Xudoning yulduzlari tepasiga. Oʻtiraman xudolar yigʻiladigan togʻda, Shimolning eng chekkasida.

¹⁴Bulutlar tepasiga chiqib boraman, Xudoyi Taoloday boʻlaman.»

¹⁵Ammo sen uloqtirilgansan oʻliklar diyoriga, Chuqurlikning tub — tubiga.

¹⁶Koʻrganlar senga tikilib qoladi, Koʻngillarida shunday oʻy kechadi: «Oʻsha odammi bu zaminni titratgan, Shohliklarni larzaga solgan?!

¹⁷Shumi olamni sahroga aylantirgan?! Shaharlarni yer bilan yakson qilgan, Asirlarni qoʻyib yubormagan?!»

¹⁸Xalqlarning shohi boʻlganlarning hammasi Muhtasham qabrlarida yotibdi.

¹⁹Ammo sen uloqtirilgansan Jirkanch chirik novdaday qabringdan. Tosh chuqurga tushadigan jasadlar, Qilichdan qulagan jasadlar Boʻlar sening kafaning.

²⁰Axir, oʻz yurtingni vayron qilgansan, Xalqingni oʻzing oʻldirgansan. Endi ular qatori dafn qilinmassan. Ey fosiq, sening nasling To abad tilga olinmas!

²¹Otasining[91] gunohlari uchun Oʻgʻillarini jallodga topshiring. Ular aslo koʻtarilmas. Endi yerga egalik qilmas, Yer yuzida shaharlar barpo qilmas.”

²²Quyidagilar Sarvari Olamning soʻzidir. “Men Bobilga qarshi qoʻzgʻalaman. Bobildagilarning nomini ham, qolgan — qutganini ham, urugʻ — aymogʻini ham yoʻq qilaman”, — deb aytmoqda Egamiz.

²³“Men Bobilni tipratikanlarga mulk qilib beraman. Uni botqoqqa aylantiraman. Xarobazor qilib, supurib tashlayman”, — deb aytmoqda Sarvari Olam.

²⁴Sarvari Olam ont ichib aytdi: “Ha, Mening belgilaganim bajo boʻladi, Mening rejalashtirganim amalga oshadi.

²⁵Ossuriya xalqini Oʻz yerimda yakson etaman, Togʻlarimda uni oyoq osti qilaman. Uning boʻyinturugʻi yurtimdan olinadi, Yuki Isroilning yelkalaridan uloqtiriladi.

²⁶Butun olam uchun shu rejani tuzdim, Butun xalqlarga qarshi qoʻlimni koʻtardim.”

²⁷Sarvari Olam reja qilgan! Qani, buni kim bekor qila oladi?! U xalqlarga qarshi qoʻl koʻtardi! Qani, Uni kim toʻxtata oladi?!

²⁸Shoh Oxoz vafot etgan yili[92] bu bashorat ayon qilindi:

²⁹“Bizni urgan tayoq[93] sindi”, deb Sevinmangiz, ey Filistlar! Axir, ilonning tuxumidan qora ilon chiqadi! Uning bolasi vahimali ajdar boʻladi!

³⁰Mana, qashshoqlarning toʻngʻichi toʻyyapti, Muhtojlar eson — omon yotibdi. Ammo sizning ildizingizni ochlikdan quritaman, Qolgan — qutganlaringiz esa qirilib ketasiz.

³¹Ey Filistlar, hammangiz Azadan adoyi tamom boʻlasiz. Faryod qil, ey darvoza! Yigʻla, ey shahar![94] Shimoldan[95] urush hidi chiqayotir, Oʻsha lashkar safdan chiqmay kelayotir.

³²Xalqlarning elchilariga qanday javob berilar? “Egamiz Quddusni[96] barqaror qildi. Oʻz xalqi orasida muhtoj boʻlganlar U yerda panoh topadi”, javobi shudir.