Read Uzbek Muqaddas Kitob Ishayo 15 Bible Online

Ishayo 15 - Uzbek Muqaddas Kitob bible

Ishayo 15

¹Moʻab[97] haqida bashorat: Vayrona boʻldi tunda, Moʻabdagi Or shahri nidosiz yotar. Vayrona boʻldi tunda, Moʻabdagi Xir shahri[98] nidosiz yotar.

²Moʻab xalqi oʻz xudosining uyiga chiqdi faryod qilgani, Ha, Dibonliklar sajdagohiga chiqdi nola qilgani. Har birining sochlari qirilgan, Har birining soqoli olingan, Navo va Midavo shaharlari uchun Moʻab nola chekar.

³Koʻchalarda xalq qanorga oʻrangan[99]. Tomlarda, xiyobonlarda faryod qilib, Hammasi koʻz yoshlarini toʻkar.

⁴Xashbon, Elaley ahli faryod chekar, Ularning ovozi Yaxazgacha eshitilar. Moʻabning qurollanganlari faryod etar, Ular qoʻrquvdan qaltirar.

⁵Yuragim Moʻab uchun faryod qiladi, Qochoqlar qochib borar Zoʻvarga, Eglat — Shalishiyo shahriga. Luxit tepaligiga ham ular yigʻlab boradi. Hatto Xoʻronayim yoʻlida Ular halokat tufayli figʻon chekadi.

⁶Ha, oʻtlar qurib ado boʻldi, Maysalar tamom boʻldi. Yashillikdan asar qolmadi, Nimrim suvi xarob boʻldi.

⁷Endi ular oʻzlari erishgan boyliklarni, Oʻzlarining hamma mol — mulklarini Arabim soyligi orqali olib ketadi.

⁸Faryod yetib borgan Exlayim shahrigacha, Yigʻi yetib borgan Ber — Ilim shahrigacha, Moʻab yurti ohu nolaga toʻldi!

⁹Ana, Dibondagi suvlar[100] qon bilan toʻla! Ammo endi Xudo Dibonga[101] battarini qiladi. Moʻabning qochib qutulganlariga, Yurtdagi qolgan — qutganlarining boshiga Sherlarni olib kelaman.