Read Uzbek Muqaddas Kitob Ishayo 16 Bible Online

Ishayo 16 - Uzbek Muqaddas Kitob bible

Ishayo 16

¹Qoʻzilar yuborgin yurtning hukmdoriga, Ularni yubor sahro yoʻli orqali Sela shahridan[102] aziz Sion togʻiga.

²Xuddi darbadar qushlarday Boʻlib qolar axir, Moʻab ahli. Uyasidan quvilgan qushlarday Ular Arnon soyligi[103] kechuvini gʻurbatda kezadi.

³Ular shunday deydi: “Maslahat ber bizga, qaror chiqar! Kunning oʻrtasida soyangni tun kabi tushir. Yashirgin quvilganlarni, Oshkor qilma qochoqlarni!

⁴Qochoqlarimiz orangizda yashasin, Qirgʻin keltiruvchi zoʻravonlardan Moʻabga boshpana boʻlgin.” Zolimlar yoʻq boʻlganda, Zoʻravonlik barham topadi. Talonchilar yurtdan gʻoyib boʻladi.

⁵Taxt oʻrnatilar sadoqat ila. Taxtda oʻtirar haqiqatgoʻy bir hukmdor. Bu hukmdor Dovud xonadonidan kelib chiqar. U adolatparvar, odillik bilan hukm chiqarar.

⁶Ha, eshitganmiz Moʻabning magʻrurligini, Uning chiroyi, kiborligi, boyligini! Naqadar magʻrurdir u! Ammo bularning hammasi yolgʻon!

⁷Endi Moʻab faryod cheksin, Hamma Moʻab uchun nola qilsin. Ha, oʻsha Xir — Xarasot[104] mayizlarini Hamma qoʻmsab, aza tutsin.

⁸Mana, holdan toydi Xashbon dalalari, Sivmo uzumzorlari ham. Xalqlarning hukmdorlari ezgan Sivmoning uzum boshlarini. Ular Yazirgacha yetib bordilar, Ular sahroda kezib yurdilar. Novdalari bir vaqtlar oʻsib ketib, Dengizdan ham oshib oʻtdi.

⁹Shu bois Yazir yigʻlaganda, men ham yigʻlayman, Ey Sivmo uzumzorlari! Koʻz yoshlarim ila sizlarni shalabbo qilaman, Ey Xashbon, Elaley shaharlari! Axir, yozgi hosilingiz barham topdi, Don hosili paytidagi oʻyin — kulgilar toʻxtadi.

¹⁰Bogʻlarda shodlik, Xursandchilik endi boʻlmas, Uzumzorlarda qoʻshiq aytilmas, Shodlik qiyqiriqlari koʻtarilmas. Uzum siqish chuqurlarida[105] Ishlaydigan hech kim qolmas. Shodlik qiyqiriqlarini Xudo bostirdi.

¹¹Shu bois yuragim Moʻab uchun Arfa kabi nola qilar. Xir — Xarasot[106] uchun vujudim faryod chekar.

¹²Moʻab xalqi kelib, oʻzini toliqtirsa ham, Sajdagohiga kelib, iltijolar qilsa[107] ham, Hech narsaga erishmas.

¹³Egamiz bu soʻzlarni Moʻab haqida oldindan aytgan edi.

¹⁴Endi Egamiz aytar: “Hozir juda koʻp boʻlganiga qaramay, yollangan ishchining muddati kabi, uch yildan keyin Moʻabning obroʻsi toʻkilar. Xalqidan qolganlari esa juda oz, zaif boʻlar.”