Read Uzbek Muqaddas Kitob Ishayo 17 Bible Online

Ishayo 17 - Uzbek Muqaddas Kitob bible

Ishayo 17

¹Damashq[108] haqida bashorat: “Ana, Damashq endi shahar boʻlmaydi! U vayronalar uyumiga aylanadi!

²Aror shaharlari tark etiladi, Suruvlar maskaniga aylanadi, Hech kim ularni hurkitmaydi.

³Efrayim yurtining[109] qal’asi yoʻq boʻladi, Damashqning shohligi ketadi. Oram xalqining omon qolganlari gʻoyib boʻladi, Bularning hammasi Isroil xalqining Shuhrati singari barham topadi, — deb aytmoqda Sarvari Olam. —

⁴Oʻsha kuni Yoqub naslining shuhrati yoʻqoladi, Tanasi ozib — toʻzib ketadi.

⁵Mana, oʻroqchilar boshoqlarni oʻrib oladi, Oʻz qoʻllari bilan don hosilini yigʻishtirib oladi. Oʻsha dalalarda terilgan bugʻdoy boshoqlariday Rafa vodiysida[110] Yoqub naslidan ham ozchilik qoladi.

⁶Ha, zaytun daraxti qoqilganda Daraxt uchida ikki — uch meva qolganday, Hosildor shoxchalarda toʻrt — besh meva qolganday Oʻsha boshoqlarda bir — ikki don qoladi”, — deb bashorat qilar Isroil xalqining Xudosi — Egamiz.

⁷Oʻsha kuni har bir odam Yaratuvchiga qaraydi, ularning koʻzlari Isroil xalqining Muqaddas Xudosini koʻradi.

⁸Inson qurbongohlarga, qoʻllarining ijodiga qaramaydi, oʻz qoʻli bilan yasagan narsalar — Asheraga[111] atalgan ustunlarni, tutatqi qurbongohlarini koʻrmaydi.

⁹Oʻsha kuni mustahkam shaharlari oʻrmonlardagi tashlandiq joylarga oʻxshab qoladi. Odamlar tashlab ketgan qir tepaliklar kabi boʻladi. Isroil xalqi dastidan bu shaharlar xarobazorga aylanadi.

¹⁰Axir, sen najotkoring Xudoni unutding, Panoh boʻladigan Qoyangni eslamading. Mana, sen yoqimli oʻsimliklar ekasan, Begona koʻchatlarni oʻtqazasan.

¹¹Ularni avaylab — asrab oʻstirasan, Tongda urugʻdan kurtak chiqartirasan, Ammo barcha hosiling yoʻq boʻladi. Faqat dard va alam senga nasib etadi.

¹²Qarang, xalqlarning koʻpligini! Ular dengiz kabi guvullaydi! Lashkarlarning hayqirigʻi Toʻlqinlar tovushiday balanddir.

¹³Ammo Egam ularga tanbeh beradi, Xalqlar ham toʻlqinlar kabi yoʻqolib ketadi. Ular uzoqlarga qochib qoladi. Togʻlardagi shamolda uchgan xas — choʻp kabi quviladi, Quyun oldidagi girdob kabi haydaladi.

¹⁴Oqshom payti! Qaranglar, kulfat! Tong otmasdan ular yoʻq boʻlib ketadi. Bizni talaydiganlarning qismati shunday boʻladi, Bizdan tortib olganlarga mana shu nasib qiladi.