Read Uzbek Muqaddas Kitob Ishayo 19 Bible Online

Ishayo 19 - Uzbek Muqaddas Kitob bible

Ishayo 19

¹Misr haqida bashorat: Ana, Egam minib olgan uchqur bulutga, U keladi Misrga. Misrning behuda butlari Uning oldida titrar, Misrning yuragi esa orqaga tortar.

²“Misr xalqini bir — biriga sapchitaman. Aka — ukalaru doʻstlar, Shaharlaru shohliklar Bir — biriga qarshi chiqar.

³Misrliklar tushkunlikka tushadi. Men ularning rejayu niyatlarini puchga chiqaraman. Ular qidirib qolar Behuda butlarniyu sehrgarlarni, Folbinlaru otalari ruhlarini.

⁴Men Misrni berahm xoʻjayinlarga topshiraman, Ha, kuchli shoh ularni boshqaradi”, — demoqda Sarvari Olam — Rabbiy.

⁵Nil suvi qurib qoladi, Daryo qurib boraveradi, U jizgʻanak yer boʻladi.

⁶Oqar suvlar badboʻy hid chiqaradi, Misrdagi Nil pasayib, quriydi. Poyalaru qamishlar chiriydi.

⁷Nil qirgʻogʻidagi, daryo boʻyidagi qamishlar, Nil boʻyiga ekilgan hamma ekinlar Qurib ketadi, sovuriladi, Ulardan hech narsa qolmaydi.

⁸Baliqchilar aza tutar, Nilga qarmoq tashlaganlar yigʻlar, Suvga toʻr yoyganlar umidsiz boʻlar.

⁹Zigʻir tolasiga ishlov beradiganlar Sharmanda boʻladilar, Oq mato toʻqiydiganlar[114] Uyatga qolib ketadilar.

¹⁰Ularning dastgohlari ishdan chiqadi, Barcha ishchilari tushkunlikka tushadi.

¹¹Ey Zoʻvan[115] shahzodalari, gʻirt ahmoqsiz axir, Ey fir’avn maslahatchilari, sizning donoligingiz ham shunday. Maslahatlaringiz daf boʻladi. Qanday qilib siz fir’avnga: “Biz donolarning oʻgʻlimiz, Qadim shohlar naslidanmiz”, deya ayta olasiz?!

¹²Ey fir’avn, qani oʻsha dono odamlaringiz?! Sarvari Olam Misrga nima reja qilganini Ular sizga bildirsin, aytsin.

¹³Mana, Zoʻvan shahzodalari ahmoq boʻldilar, Nuf[116] shahzodalari aldandilar. Misrni oʻz qabila boshliqlari yoʻldan urdilar,

¹⁴Ularning aqlini Egam chalkashtirdi, Qusugʻiga dumalaydigan mast qanday boʻlsa, Misrni ular shunday yoʻldan ozdirar.

¹⁵Misrga hech kim yordam bera olmas, Na boshi, na quyrugʻi, na xurmosi, na qamishi[117].

¹⁶Oʻsha kuni Misr xotin kishiga oʻxshab qoladi. Sarvari Olam unga qarshi qoʻlini koʻtaradi, shunda Misr titrab dahshatga tushadi.

¹⁷Yahudo Misrliklarni dahshatga soladi. Sarvari Olam ularni vahimaga solganini eslagan har bir odam dahshatga tushadi.

¹⁸Oʻsha kunga kelib, Misrdagi beshta shahar ibroniy tilida[118] gapiradigan boʻladi. Ular Sarvari Olam oldida ont ichadilar. Bu shaharlardan biri “Quyosh shahri”[119] deb ataladi.

¹⁹Oʻsha kuni Misrning oʻrtasida Egamiz uchun bir qurbongoh quriladi, chegarada Egamizga atalgan bir muqaddas tosh oʻrnatiladi.

²⁰Bular Sarvari Olam uchun Misrda bir belgi va guvoh boʻladi. Xalq zolimlar dastidan yolvorganda, Egamiz ularni qutqaradigan bir himoyachi yuboradi. U xalqni qutqaradi.

²¹Egamiz Oʻzini Misrliklarga zohir qiladi. Misrliklar ham oʻsha kuni Uni tan oladilar. Egamizga qurbonliklar keltiradilar, nazrlar atab, sajda qiladilar. Unga va’da berib, va’dalarini ado etadilar.

²²Egamiz Misrliklarni xastalik keltirish bilan jazolaydi, keyin shifo beradi. Ular Egamizga yolvoradilar, Egamiz ularga shifo beradi.

²³Oʻsha kuni Misr bilan Ossuriya oʻrtasida bir yoʻl boʻladi. Ossuriyalik Misrga, Misrlik Ossuriyaga borib kelaveradi. Ossuriyaliklar bilan Misrliklar birgalikda sajda qiladilar.

²⁴Oʻsha kuni Misr bilan Ossuriya qatorida Isroil uchinchi xalq boʻladi. Uchalovi yer yuziga baraka boʻladi.

²⁵Ha, Sarvari Olam ularga marhamat qilib, shunday degan: “Ey xalqim Misr, qoʻllarimning ijodi Ossuriya, Oʻzimning mulkim Isroil, baraka topinglar!”