Read Uzbek Muqaddas Kitob Ishayo 20 Bible Online

Ishayo 20 - Uzbek Muqaddas Kitob bible

Ishayo 20

¹Ossuriya shohi Sargon oʻz lashkarboshisini Ashdod shahriga yubordi. Lashkarboshi kelib, Ashdodni qoʻlga oldi[120].

²Oʻsha paytda Omiz oʻgʻli Ishayoga Egamiz shunday dedi: — Qani, egningdagi qanorni[121] yech, oyoqlaringdagi choriqlaringni yech. Ishayo aytilganlarni qildi. U yalangʻoch, yalangoyoq yuradigan boʻldi.

³Shunda Egamiz dedi: — Qulim Ishayo uch yil yalangʻoch, yalangoyoq yurgani Misr va Habashiston[122] qismatini bildiruvchi belgi va alomatdir.

⁴Ossuriya shohi Misr asirlarini, Habashiston tutqunlarini, yoshu qarisini yalangʻoch, yalangoyoq, uyatli joylari ochiq holda haydab ketadi. Misr sharmanda boʻladi.

⁵Habashistonga umid bogʻlagan, Misrdan faxrlangan xalq isnodga qoladi.

⁶Oʻsha kuni qirgʻoqdagi yurtning aholisi[123] shunday deb aytadi: “Biz ishongan odamlarning ahvolini koʻrib qoʻying. Ular bizga yordam berib, Ossuriya shohining qoʻlidan qutqaradi, deb yurardik. Endi qanday qutular ekanmiz?!”