Read Uzbek Muqaddas Kitob Ishayo 21 Bible Online

Ishayo 21 - Uzbek Muqaddas Kitob bible

Ishayo 21

¹Dengiz boʻyidagi sahro[124] haqida bashorat: Nagav uzra ketma — ket esayotgan boʻronlar kabi, Choʻldan — qoʻrqinchli yurtdan kelayotir bosqinchi.

²Men mudhish bir vahiy koʻrdim: Xoin xoinlik qilayotir, Bosqinchi talon — taroj qilayotir. Egamning soʻzlarini eshitdim: “Ey Elam xalqi, hujum qil, Ey Midiya[125] xalqi, qamal qil! Jamiki nolalarga barham beraman!”

³Evoh, koʻrganlarimdan ichimda ogʻriq turdi, Tugʻayotgan ayol kabi azoblar meni qamradi. Ikki bukildim eshitganlarimdan, Dahshatga tushdim koʻrganlarimdan.

⁴Yuragim uvushib ketdi, Qoʻrquvdan titrab ketdim. Oqshomni kutgandim, Oqshom esa qoʻrquvga toʻla.

⁵Bobilliklar gilamlar toʻshab, Dasturxon hozirlamoqdalar, Ular yeb — ichmoqdalar. Birdaniga shunday ovoz eshitilmoqda: “Qoʻzgʻaling, ey rahnamolar, qalqonlarni yogʻlang!”

⁶Rabbiy menga shunday dedi: “Qani, bir qorovul qoʻy, Koʻrganini yetkazsin.

⁷Jang aravalarining, otliqlarning, Eshaklarga, tuyalarga minganlarning Juft — juft boʻlib kelganini koʻradi. Yaxshilab e’tibor bersin.”

⁸Shu lahzada qorovul sherday oʻkirib qoldi[126]: “Ey toʻram, men kunduzi har doim Qorovul minorasida turaman, Har tun ham joyimdaman.

⁹Ana, jang aravalari, otliqlar Juft — juft boʻlib kelayotir!” Shu on u baqirib xabar berdi: “Quladi, Bobil quladi![127] Butlari sinib, yer bilan bitta boʻldi!”

¹⁰Eh, xalqim! Xirmonda bugʻdoy kabi yanchilgan[128] xalqim! Isroil xalqining Xudosi — Sarvari Olamdan Eshitganlarimni sizga bildirdim.

¹¹Dumax[129] haqida bashorat: Seirdan[130] meni chaqirishar: “Ey posbon, qachon tong otar? Qachon tong otar?”

¹²Javobim shudir: “Tong otayotir, Ammo yana kech kiradi. Koʻproq bilmoqchi boʻlsangiz, Yana qaytib keling.”

¹³Arabiston haqida bashorat: Gʻarb oʻrmonlarida tunaysiz, Ey Dedon[131] karvonlari!

¹⁴Ey Temo[132] aholisi! Suv keltiring, tashnalarga peshvoz chiqing! Qutulib omon qolganlarga non bering!

¹⁵Axir, ular qochayotirlar qilichdan, Dushmanning koʻtarilgan qilichidan, Tarang tortilgan yoylardan, Shafqatsiz urushlardan.

¹⁶Rabbiy menga shunday dedi: “Yana bir yildan keyin, yollangan ishchining muddati kabi, Kedarning[133] ulugʻvorligi barham topadi.

¹⁷Kedarning jasur kamonkashlaridan ozginasi qoladi.” Ha, Isroil xalqining Xudosi — Egamiz shunday dedi.