Read Uzbek Muqaddas Kitob Ishayo 23 Bible Online

Ishayo 23 - Uzbek Muqaddas Kitob bible

Ishayo 23

¹Tir[143] haqida bashorat: Ey Tarshish[144] kemalari, faryod qiling! Siz Kipr[145] sohilida eshitgan xabarlar toʻgʻri, Boshpanangiz boʻlgan Tir vayron boʻldi.

²Sukut saqlang, ey orol xalqi! Ey Sidon[146] savdogarlari! Bir paytlar kemalarga toʻla edingiz.

³Shixor[147] doni, Nilning hosili Tirning daromadi boʻlgan edi, U elatlardan foyda qilardi.

⁴Uyat senga, ey Sidon! Axir, Tir, dengiz boʻyidagi qal’a shunday demoqda: “Na toʻlgʻoq azobin chekdim, na tugʻdim, Na oʻgʻillar, na qizlar ulgʻaytirdim.”

⁵Tir toʻgʻrisida eshitganda, Misrning yuragi qinidan chiqay deydi.

⁶Tarshishga joʻnang, ey qirgʻoq aholisi, Faryod qiling!

⁷Qadimda barpo boʻlgan, Takabbur shahringizning holi ne boʻldi? Endi darbadar boʻlasiz, Uzoq, begona yurtni vatan qilasiz.

⁸Tirga qarshi kim bunday qaror chiqardi? Bu shahar shohlarga toj kiydirgandi, Savdogarlari hukmdor edi, Butun dunyo ularni izzat qilardi.

⁹Sarvari Olam qabul qildi bu qarorni: “Takabburligi, ulugʻvorligi yoʻq boʻlsin, Butun olam izzat qilganlar yerga urilsin.”

¹⁰Ey Tarshish ahli! Nil boʻyidagi dehqonlar kabi, Yerlaringga ishlov ber[148]. Axir, bandargohing yoʻq endi[149].

¹¹“Kan’on qal’alari vayron boʻlsin”, deb Egamiz amr berdi. Ha, U dengizga qarshi qoʻl koʻtardi, Shohliklarni titratdi.

¹²Egamiz shunday dedi: “Zulm chekkan, ey Sidon ahli, Endi xursandchilik bilmay oʻtasan. Qani, Kiprga joʻna, U yerda rohat nimaligin bilmay oʻtasan.”

¹³Ana Bobil[150] yurtiga boq, endi uning xalqi yoʻq. Ossuriyaliklar qurshov minoralari qurdilar, Bobilliklarning saroylarini yakson qildilar. Yurtni vayronaga aylantirdilar, yovvoyi hayvonlarga berdilar.

¹⁴Faryod qiling, ey Tarshish kemalari, Endi yoʻq boshpanangiz![151]

¹⁵Shundan keyin Tir shahri bir shohning umricha — yetmish yilga unutiladi. Yetmish yil oʻtgandan keyin, Tir ham quyidagi qoʻshiqda aytilgan fohishaday boʻladi.

¹⁶Arfangni ol, shahar boʻylab kez, Ey hamma unutgan fohisha! Qani, goʻzal qilib chal — chi! Qoʻshiq ketidan qoʻshiq kuyla — chi! Balki seni eslab qolarlar.

¹⁷Yetmish yil oʻtgach, Egamiz Tir bilan yana aloqada boʻladi. Ammo Tir pul uchun yana fohishalik qila boshlaydi. Dunyoning hamma shohliklariga fohisha boʻladi.

¹⁸Shahar tijoratdan va fahshdan olgan daromadlarini Egamizga ataydi. Daromadlar yigʻilmaydi ham, saqlanmaydi ham. Tijoratdan olganlarini toʻyguncha yesinlar, chiroyli kiyinsinlar deb, daromad Egamizning huzurida yashayotganlarga beriladi.