Read Uzbek Muqaddas Kitob Ishayo 25 Bible Online

Ishayo 25 - Uzbek Muqaddas Kitob bible

Ishayo 25

¹Ey Egam, Sen mening Xudoyimsan. Men Seni ulugʻlayman, Senga hamdu sanolar aytaman. Sen ajoyib ishlar qilgansan, Qadimdan tuzgan rejalaringni, Sadoqat bilan amalga oshirgansan.

²Yakson qilding dushmanlarimiz qal’alarini, Vayronaga aylantirding mustahkam shaharlarini, Yoʻq qilding uzoq yurtdagi ajoyib saroylarini, Ular hech qachon qayta tiklanmas.

³Endi kuchli xalqlar Seni izzat qiladi, Shafqatsiz xalqlar Senga sajda qiladi.

⁴Kambagʻal, bechoralar kulfatda qolganda, Sen ularga boshpana boʻlding. Peshindagi jaziramadan soya, Jaladan panoh boʻlding. Vahshiy gʻanimlarning hujumi boʻronday boʻldi. Sen esa bizning panohimiz boʻlding.

⁵Dushman shovqin — suroni Sahro issigʻi kabi boʻlganda, Jazirama issiqni Sen Bulutlar soyasi ila bosding. Dushmanning sevinch qoʻshigʻi Sadolarini oʻchirding.

⁶Bu togʻda[152] Sarvari Olam Jamiki xalqlar uchun Ajoyib ziyofat tayyorlar. Boy dasturxon, sara sharoblar, Yogʻli goʻshtlar, tiniq sharob tortiladi.

⁷Oʻsha kuni Egam jamiki xalqlar ustidan Kafanlarini yechib tashlaydi. Mana shu togʻda Egam Xalqlarni oʻragan, elatlar ustidagi Yopinchiqni olib tashlaydi.

⁸Ha, U oʻlimni butunlay yutib yuboradi. Egam Xudo hammaning koʻz yoshlarini artib qoʻyadi, Butun yer yuzida Oʻz xalqining uyatini olib tashlaydi. Ha, Egam shunday deb aytgan!

⁹Oʻsha kuni ular shunday deydilar: “Mana, bizning Xudoyimiz, Qutqarsin deb, Uni kutgandik, U bizga najot berdi. Kelinglar, quvonaylik, sevinaylik! Umid qilib kutgandik, Mana, bizning Egamiz.”

¹⁰Egamning Oʻzi bu togʻni himoya qilar. Moʻab[153] xalqi yanchilgan somonday ezilar, Chiritish uchun goʻng chuqurga uloqtirilar.

¹¹Ha, ular bor kuchi bilan Suzuvchiga oʻxshab chuqurdan chiqishga intilar. Ammo Xudo ularning gʻururini yakson qilar, Qoʻllarining mohirligi foyda bermas.

¹²Moʻabning qal’a devorlari buzib tashlanar, Vayronaga aylanar, yer bilan yakson boʻlar.