Read Uzbek Muqaddas Kitob Ishayo 26 Bible Online

Ishayo 26 - Uzbek Muqaddas Kitob bible

Ishayo 26

¹Oʻsha kuni Yahudo yurtida ushbu qoʻshiq kuylanar: “Mana, shahrimiz qudratlidir! Egamiz bizning qal’amizdir, Uning Oʻzi bizga najot beradi.

²Oching shahar darvozalarini! Sadoqatli solih xalq ichkari kirsin!

³Ey Egamiz, Senga ishonib, Fikri — zikri Sendan uzilmaydiganga Oʻzing komil tinchlik ato qilasan.

⁴Egamizga to abad ishon, Uning Oʻzi[154] abadiy Qoyamizdir.

⁵Yuksalganlarni U yiqitdi, Takabbur shaharni vayron qilib, Yer bilan bitta qildi.

⁶Oʻsha shaharni mazlumlar oyoq osti qildi, U bechoralarning qadamlari ostida ezildi.”

⁷Solihning yoʻli tekisdir, Toʻgʻri yoʻlni Sen unga tayyorlaysan.

⁸Ey Egamiz, yoʻl — yoʻriqlaring ila Senga umid qilamiz. Sening nomingni sharaflash Koʻnglimiz istagidir.

⁹Tun boʻyi yuragim Seni qoʻmsaydi, Ha, men Senga intilaman. Yer yuzida Sening hukming boʻlganda, Olam ahli adolatni biladi.

¹⁰Fosiqlar marhamat koʻrganda Ular aslo solihlikni oʻrganmas. Haqqoniylik oʻrniga ular egrilik qilaveradi, Sening ulugʻvorligingni ular koʻrmaydi.

¹¹Ey Egamiz, qoʻling koʻtarilgan, Jazolashga tayyor, Ammo ular buni koʻrmaydi. Xalqingni deb jon kuydirganingni koʻrib, Ular sharmanda boʻlsin. Gʻanimlaringga atalgan olov ularni yutsin.

¹²Ey Egamiz, bizga Sen tinchlik ato etasan, Qilgan ishlarimizning barchasiga Yetishganmiz Sening qudrating ila.

¹³Ey Egamiz Xudo, Sendan boshqalar Ustimizdan hukmronlik qildilar, Ammo biz yolgʻiz Sening nomingni tilga olamiz.

¹⁴Oʻliklar yashamas, Ular aslo qaytib kelmas. Ularni Sen jazolab, qirib tashlading, Ularni tamomila xotiradan oʻchirding.

¹⁵Ey Egamiz, xalqimizni Sen koʻpaytirding, Xalqni koʻpaytirib, Oʻzing yuksalding, Yurtning barcha chegaralarini kengaytirding.

¹⁶Ey Egamiz, kulfatda qolganlarida Ular Senga yuz burdilar, Sening tanqidlaring ostida egildilar.

¹⁷Toʻlgʻoq tutayotgan ayol ogʻriqdan qichqirganday, Toʻlgʻonib, dod — faryod qilganday, Biz ham Sening oldingda shunday boʻldik, ey Egamiz!

¹⁸Homilador boʻlib, dard chekdik, Ammo shamoldan boshqa hech narsa koʻrmadik. Na yer yuzida biz gʻolib boʻldik, Na avlodlar dunyoga keltirdik.

¹⁹Ammo Sening oʻlik xalqing tiriladi, Tanalari oʻrnidan turadi. Ey tuproq ostida yotganlar, qoʻzgʻaling, Shodlikdan hayqiring! Ey Egamiz, shabnaming tonggi shabnamga oʻxshaydi, Zamin murdalariga hayot bagʻishlaydi.

²⁰Keling, ey xalqim, bir oz yashirinib turing! Egamizning gʻazabi bosilguncha, Kiring ichkariga, Ortingizdan eshiklarni yopib qoʻying!

²¹Ana, Egamiz kelayotir maskanidan Zamin ahlini gunohlari uchun jazolagani. Yer toʻkilgan qonlarni fosh etadi, Qotillikning qurbonlarini endi yashirmaydi.