Read Uzbek Muqaddas Kitob Ishayo 27 Bible Online

Ishayo 27 - Uzbek Muqaddas Kitob bible

Ishayo 27

¹Oʻsha kuni Egamiz qilichi bilan Levitanni[155] jazolar. Ha, shafqatsiz, bahaybat, qudratli qilichi bilan jazolar Oʻsha qochayotgan, gʻimirlayotgan ilon — Levitanni. Oʻldirar dengizdagi oʻsha ajdarhoni.

²Egam aytar: “Oʻsha kuni ajoyib uzumzor[156] toʻgʻrisida kuylang!

³Men, Egangiz, uzumzor qoʻriqchisiman, Doimo uni sugʻoraman. Kechayu kunduz uzumzorni qoʻriqlayman, Hech kim unga zarar keltirolmaydi.

⁴Men gʻazabda emasman! Lekin tikanlaru butalar Menga qarshi chiqsa, Ular bilan jang qilaman. Ularni yondirib tashlayman.

⁵Ular Mendan panoh izlab kelsin! Ha, Men bilan tinchlik oʻrnatsin, Ular Men bilan tinchlik oʻrnatsin.”

⁶Vaqti kelib, Yoqub nasli ildiz otadi, Isroil kurtak otib, gullaydi, Yer yuzini mevalari bilan toʻldiradi.

⁷Isroilning dushmanlarini Egamiz qattiq jazolaydi! Isroilning koʻp gʻanimlarini Egamiz oʻldiradi, Isroilni esa u qadar jazolamaydi,

⁸Egamiz Oʻz xalqini jazolaganda Ularni yurtidan haydab, surgun qiladi. Sharqdan esgan boʻron kabi, Ularni uzoqqa olib ketadi.

⁹Shunday qilib, Egamiz Yoqub naslini gunohdan poklaydi. U butlarga atalgan qurbongohlarni parchalab tashlaydi. Asheraga[157] atalgan ustunu tutatqi qurbongohlardan asar ham qolmaydi.

¹⁰Mana, Isroilning mustahkam shaharlari tashlandiq boʻladi, Tark etilgan sahroday, huvullagan yurt boʻladi. Vayronalar orasida chorva oʻtlab yuradi, Daraxtlarning bargini yeb, ship — shiydam qiladi.

¹¹Shoxlari qurib, sinib yotadi, Ayollar kelib, ularni yoqadi. Bu xalq aql — hushidan ayrilgan, Yaratuvchi ham ularga achinmaydi, Xudo ularga marhamat koʻrsatmaydi.

¹²Oʻsha kuni, ey Isroil xalqi, Egamiz sizlarni Furot daryosidan Misr chegarasidagi irmoqqacha[158] boʻlgan yerda yanchadi[159]. Hammangizni bitta — bitta yigʻib keladi.

¹³Oʻsha kuni katta karnay chalinadi. Ossuriya yurtida yoʻqolganlar, Misr yurtiga quvilganlar kelib, Quddusdagi muqaddas togʻda[160] Egamizga sajda qiladi.