Read Uzbek Muqaddas Kitob Ishayo 28 Bible Online

Ishayo 28 - Uzbek Muqaddas Kitob bible

Ishayo 28

¹Ey ulugʻvorlik toji boʻlgan shahar! Holingga voy! Sen Efrayimdagi[161] mast — alastlarning ulugʻvorligi eding! Eh, ajoyib, goʻzal shahar eding! Shuhrating gulday soʻlmoqda! Serhosil vodiydagi unumdor shahar eding. Tubanlashding sharobdan!

²Mana, Rabbiyning kuchli bir bahodiri bor[162]. U selga, vayron keltiradigan quyunga oʻxshaydi. Yuvib ketadigan, toshqin jalalarga oʻxshaydi. Oʻz qoʻllari bilan u Efrayimni yakson qiladi.

³Eh, Efrayimdagi mast — alastlarning ulugʻvorlik toji! Ana endi oyoq ostida toptaladi!

⁴Serhosil vodiydagi unumdor shahar edi! Endi ularning shuhrati gullar kabi soʻnadi. Ular ilk pishgan anjirlarga oʻxshaydi, Pishgan zahoti yulinib, yutib yuboriladi.

⁵Oʻsha kuni Sarvari Olam Oʻzining xalqidan qolganlari uchun Shuhrat tojiyu ajoyib gulchambar boʻladi.

⁶Hukm kursisida oʻtirganlarga U adolat ruhini beradi. Darvozadan dushmanga zarba beradiganga U jasorat manbayi boʻladi.

⁷Ruhoniy, paygʻambarlar sharob tufayli, Oʻtkir ichimliklardan gandiraklab yuradi. Ha, sharob, boʻzalardan ularning boshi aylanadi, May dastidan ular yoʻllaridan adashadi, Oʻtkir ichimlikdan gandiraklab yuradi. Ular vahiy koʻrganlarida xato qiladi, Qiladigan hukmlarida adashadi.

⁸Ularning dasturxoni qusuqqa toʻla, Birorta ham toza joy yoʻq.

⁹Ular menga ta’na qilib aytadi: “Sen kimga ta’lim berayotganingni bilasanmi oʻzi?! Bizni endi koʻkrakdan ajratilgan goʻdak deb oʻylayapsanmi?!

¹⁰Qachon qarama, bidir — bidir qilasan, Goʻdakday guvranasan[163].”

¹¹Shunday ekan, Xudo ularga, Oʻzga tilda, tushunarsiz shevada[164] gapiradi.

¹²Xudo ularga qayerda orom topishlarini aytgan, Tinchlikka qanday erishish kerakligini oʻrgatgan, Ammo ular quloq solishni istamadilar.

¹³Shu sababdan Egamizning soʻzi Ular uchun mazmunsiz soʻzlarday boʻladi. Goʻdakning guvranishiday[165] eshitiladi. Ular yurmoqchi boʻlganlarida Orqaga yiqilib, yaralanadilar, Tuzoqqa tushib, olib ketiladilar.

¹⁴Shu bois Egamdan kelgan bu xabarni eshiting, Ey Quddusdagi masxaraboz hukmdorlar!

¹⁵Sizlar shunday dedingiz: “Biz Oʻlim bilan ahd qilganmiz, Oʻliklar diyori[166] ila bitim tuzganmiz. Dahshatli ofat kelib boshimizga tushmaydi. Axir, yolgʻonni panoh qilib olganmiz, Soxtalikni chodir qilib olganmiz.”

¹⁶Shu bois Egamiz Rabbiy aytmoqda: “Mana, Men joylashtiryapman Quddusda[167] Sinalgan bir toshni, poydevor toshini. Bu qadrli tamal toshi[168] ishonchli poydevordir. Ha, unga tayangan hech bir inson umidsiz boʻlmaydi.

¹⁷Men adolat bilan hukm qilaman, Toʻgʻrilik oʻlchovim boʻladi. Soxta panohingizni doʻl yuvib ketadi, Chodiringizni sellar yuvib ketadi.

¹⁸Oʻlim bilan tuzgan ahdingiz bekor boʻladi, Oʻliklar diyori ila qilgan bitimingiz barbod boʻladi. Dahshatli ofat yurtdan oʻtayotganda, Sizlar yer bilan yakson boʻlasiz.

¹⁹Ha, har tongda, tunu kun Oʻsha toʻfon sizni yuvib ketadi.” Eshitganingizni anglab yetganingizda, Bu xabar gʻoyat katta xavfdan darak beradi:

²⁰Yotgani toʻshagingiz kaltalik qiladi, Yopingani koʻrpangiz ensizlik qiladi[169].

²¹Perazim togʻidagiday[170] Oʻz ishimni qilay, deb Egam qoʻzgʻaladi. Givon vodiysidagiday[171] U gʻazabga minadi. Ha, U Oʻzining ajoyib ishini qiladi. Uning ishlari hayratda qoldiradi.

²²Masxaralashni bas qiling endi, Boʻlmasa zanjirlaringiz yana ogʻirlashadi. Sarvari Olam — Rabbiy menga: “Butun yurtni vayron qilaman”, deb aytdi.

²³Tinglang, ovozimga quloq soling, Diqqat qiling, gaplarimni eshiting!

²⁴Dehqonlar ekish uchun yerga ishlov beraveradimi?! Tuproq kovlayveradi — yu, hech qachon ekmaydimi?!

²⁵Yoʻq, ular yerni tekislaydi, Keyin ukrop, zira urugʻini sepadi. Belgilangan joylariga Har turli bugʻdoy, arpa urugʻini ekadi.

²⁶Ha, dehqonlar nima qilishni biladi, Xudo ularga aql — idrok bergan!

²⁷Axir, ukropni bolgʻa bilan yanchmaydi, Zirani arava gʻildiragi bilan ezmaydi. Mana, ukropni kaltak bilan yanchib oladi, Zirani tayoq bilan ezib oladi.

²⁸Bugʻdoydan un qilinadi, Ammo u to abad yanchilmaydi[172]. Arava gʻildiragi bugʻdoy ustidan Chang boʻlguncha yurgizilmaydi.

²⁹Bu donolik kelar Sarvari Olamdan, Uning maslahatlari ajoyib, donoligi buyukdir.