Read Uzbek Muqaddas Kitob Ishayo 29 Bible Online

Ishayo 29 - Uzbek Muqaddas Kitob bible

Ishayo 29

¹Egam aytar: “Holingga voy, ey Dovud yashagan shahar! Ey Oriyol[173], Oriyol! Yillar ortidan yillar oʻtaveradi, Bayramlar nishonlanadi.

²Ammo Men boshingga kulfat keltiraman, Faryod qilib, nola chekasan, Seni qurbongoh[174] qilaman.

³Atrofingda senga qarshi lashkar toʻplayman, Qamal inshootlarini[175] oʻrnataman. Minoralar qurib, seni oʻrab olaman.

⁴Yerning ostidan sen gapirasan, Tuproq ostidan soʻzlaring keladi, Ovozing sharpa ovoziday yer ostidan chiqadi, Gaplaring tuproq ostidan shivirlab keladi.

⁵Ammo shunda shafqatsiz dushmanlaring Birdaniga chang kabi uchib ketadi, Toʻsatdan boʻrondagi xas — choʻpday Ular toʻzib ketadi.

⁶Kelaman Men, Sarvari Olam, gumbur — gumbur, Zilzila, shovqin — suron, dovul, Boʻronu yutib yuboruvchi alanga bilan.

⁷Ey Quddus[176], sizga qarshi chiqqan xalqlar yoʻq boʻlib ketadi. Sizning qal’angizga hujum qilgan vahshiy elatlar Tundagi tush kabi oʻtib ketadi.

⁸Ha, och odam tushida ovqat yesa ham, Uygʻonganda, ochligicha qolaveradi. Chanqagan odam tushida suv ichadi — yu, Chanqogʻi qonmasdan uygʻonadi. Ey Sion togʻi, sizga qarshi chiqqan Jamiki elatlar ham shu ahvolga tushadi.”

⁹Qulogʻingizni kar qiling, dong qotib qoling, Koʻzingizni koʻr qiling, koʻrmas boʻling, Mast boʻling, ammo sharobdan emas, Gandiraklab yuring, ammo boʻzadan emas.

¹⁰Egam sizni qattiq uxlatib qoʻydi, Ey paygʻambarlar, Egam koʻzlaringizni uyquga bostirdi. Ey valiylar, Egam boshu koʻzlaringizni oʻrab qoʻydi.

¹¹Mana, bu vahiyning hammasi sizlar uchun muhrlangan oʻrama qogʻozday[177] boʻlib qoldi. Bu oʻrama qogʻoz oʻqiy oladiganlarga berilib: “Buni oʻqing!” deb buyurilsa, ular: “Yoʻq, muhrlangan ekan”, deydilar.

¹²U oʻqiy olmaydiganlarga berilib: “Buni oʻqing”, deb aytilgan boʻlsa, ular: “Biz oʻqishni bilmaymiz”, deb javob beradilar.

¹³Ha, Rabbiy aytdi: “Bu xalq faqat soʻzdagina Menga yaqinlashadi, Tilidagina Meni izzat qiladi, Yuraklari esa Mendan uzoqdir. Ular inson yaratgan qoidalari orqali Menga sajda qilishadi.

¹⁴Mana, Men shunday bir ish qilamanki, Bu xalq hayratda qoladi, Lol boʻlib, dong qotadi. Donolari donoligidan mahrum boʻladi, Idroklilari idrokidan ayriladi.”

¹⁵Holingizga voy! Egamizdan rejalaringizni yashiryapsiz, Ishlaringizni qorongʻilikda qilyapsiz. “Kim bizni koʻrardi, kim bizni bilardi?” deysiz.

¹⁶Hammasini agʻdar — toʻntar qilyapsiz, Axir, kulolni loyga tenglashtirib boʻladimi?! Nahotki buyum oʻzini yaratganga: “Meni yaratganing yoʻq”, deb aytsa?! Nahotki idish kulolga: “Sen tushunmaysan”, deb aytsa?!

¹⁷Mana, qisqa vaqt ichida Lubnon oʻrmoni[178] dalaga aylanadi. Dala esa qalin oʻrmon boʻladi.

¹⁸Oʻsha kuni kitobdagi soʻzlarni karlar eshitar, Koʻrlarning koʻzlari zulmatda nur koʻrar.

¹⁹Bechoralarga Egam yangi quvonch ato etadi, Isroil xalqining Muqaddas Xudosi tufayli Muhtojlar shod boʻladi.

²⁰Zolimlar to abad yoʻq boʻladi, Mazaxchilar halok boʻladi, Yomonlik istovchilar qirib tashlanadi.

²¹Ular odamlarga tuhmat yogʻdirar, Hakamlarga tuzoq qoʻyar, Solihlarni adolatdan mahrum qilar.

²²Shu bois Ibrohimni qutqargan Egam Yoqub xonadoni toʻgʻrisida shunday deb aytmoqda: “Yoqub nasli endi hech qachon sharmanda boʻlmaydi, Qoʻrquvdan uning rangi oqarmaydi.

²³Isroil xalqi Men bunyod etgan farzandlarini koʻrganda Ular Mening nomimni muqaddas deb biladi, Meni — Yoqub naslining Xudosini muqaddas deb tan oladi. Ha, Men, Isroil Xudosining huzurida hayratda turadi.

²⁴Yoʻlidan adashganlar oʻshanda tushunib yetadi, Noliganlar yoʻl — yoʻriqlarimni oʻrganadi.”