Read Uzbek Muqaddas Kitob Ishayo 3 Bible Online

Ishayo 3 - Uzbek Muqaddas Kitob bible

Ishayo 3

¹Sarvari Olam — Rabbiy endi Quddus va Yahudo xalqiga har turli ta’minot hamda madad bermay qoʻyadi. Ularni non va suvdan bebahra qilyapti.

²Jangchilar va askarlardan, hakamlar va paygʻambarlardan, folbinlar va oqsoqollardan mahrum qilyapti.

³Ellikboshi va amaldorlardan, maslahatchilardan, mohir ustalar va “dono” afsungarlardan judo qilyapti.

⁴Egam aytar: “Bolalar hukmron boʻlar bu xalq ustidan, Aqlsizlar hukmronlik qilar ular tepasidan.”

⁵Xalq bir — biriga zulm qiladi, Har kim doʻstiga dushman boʻladi. Haqorat qilar yosh yigit oqsoqolni, Sharmanda odam esa obroʻli odamni.

⁶Odamlar oʻz yaqinini ushlab olib, Oʻsha qarindoshiga shunday deydilar: “Ustingda kiyiming bor ekan, Bizga bosh boʻla qol. Mana bu vayronalar uyumi Sening qoʻl ostingda boʻladi.”

⁷U esa oʻsha kuni qasam ichib aytar: “Axir, men shifo bera olmayman, Meni qilmang xalqqa boshliq, Uyimda bor na non, na kiyim.”

⁸Ha, Quddus ham, Yahudo ham quladi. Xalqining tillari, ishlari Egamizga qarshidir. Egamning shuhratini ular yerga bulgʻadi.

⁹Yuzlari guvohlik berib turar, Ular Sadoʻm[17] kabi gunohlarini oshkor qilar. Ha, gunohlarini ular yashirmas. Eh, oʻzlari boshlariga keltirar kulfat! Ularning holiga voy!

¹⁰Solihlarga esa yaxshilik koʻrasan, deb ayting, Ular oʻz ishlarining samarasidan lazzat topadi.

¹¹Ammo fosiqlarning holiga voy! Boshlarida kulfat, Axir, qilmishlariga yarasha qaytadi oʻzlariga.

¹²Yosh bolalar ezadi xalqimni, Ayollar hukmronlik qiladi ular ustidan. Ey xalqim, yoʻlboshchilaring seni chalkashtiradi, Soʻqmoqlaringdan seni adashtiradi.

¹³Egamiz Oʻz da’vosini isbot qilmoqqa kirishayotir, Ha, xalqlarni hukm qilmoqqa U qoʻzgʻalayotir.

¹⁴Oʻz taxtiga oʻtirib Egamiz Oʻz xalqining oqsoqollariyu Shahzodalari bilan hukmga kirishar: “Sizlar Mening uzumzorimni[18] xarob qilgansiz. Kambagʻaldan olgan oʻlja bilan toʻla uyingiz.

¹⁵Nimasi bu?! Xalqimni ezaverasiz! Kambagʻalni iskanjaga olaverasiz!” Sarvari Olam — Rabbiyning soʻzidir bu.

¹⁶Egam aytar: “Magʻrurdir Quddus[19] ayollari, Boʻyinlarini likillatib, koʻzlarini suzib yurar, Mayda qadam tashlab yurib, Toʻpigʻidagi halqalarni jiringlatar.”

¹⁷Shu bois Rabbiy yara qilar Quddus ayollarining boshlarini, Sharmanda qilar ochib uyatli joylarini.

¹⁸Oʻsha kuni Rabbiy tortib olar ularning Goʻzalligi — toʻpigʻidagi bezaklarini, Tillaqoshlariyu zeb — ziynatlarini,

¹⁹Sirgʻalari, bilaguzuk va harir roʻmollarini, Tortib olar boshidagi tojini, Bilaguzuk, marjon, xushboʻy moy, tumorlarini,

²⁰Muhr uzuklarini, burundagi sirgʻalarini,

²¹Tortib olar shohona libosini, Nafis koʻylaklari, nimchalari, karmonlarini,

²²Koʻzgulari, zigʻir liboslarini, Tillaqoshlariyu harir roʻmollarini.

²³Xushboʻy hid oʻrniga ulardan sassiq hid keladi, Kamarlar oʻrniga arqon bogʻlab yuradi, Turmaklangan soch oʻrniga kal bosh boʻladi, Bashang kiyim oʻrniga qanor kiyadi, Ha, goʻzallik oʻrniga asirlik tamgʻasi boʻladi.

²⁴Mana, yigitlari qilichdan yiqilib qoladi, Botir erkaklari jangda qirilib ketadi.

²⁵Quddus darvozalari yigʻlab, aza tutadi. Sion boʻm — boʻsh boʻlib, yerda oʻtiribdi.