Read Uzbek Muqaddas Kitob Ishayo 31 Bible Online

Ishayo 31 - Uzbek Muqaddas Kitob bible

Ishayo 31

¹Misrdan yordam soʻrab borganlarning holiga voy! Ular chopqir otlariga ishonadilar, Jang aravalarining koʻpligiyu Kuchli otliqlarga umid bogʻlaydilar. Isroil xalqining Muqaddas Xudosiga esa Nazar ham tashlamaydilar, Egamizga yuz burmaydilar.

²Dono Egamizning gapiga ular kirmaydilar. Egamiz fosiqlarning xonadoniga qarshi qoʻzgʻaladi, Badkirdorlarga yordam berganlarga qarshi turadi. Ularning boshiga kulfat keltiradi, Aytgan soʻzlarini U qaytib olmaydi.

³Misrliklar Xudo emas, insonlardir, Ularning otlari ruh emas, tanadir. Egamiz ularga qarshi qoʻl koʻtarganda, Madadkor qoqiladi, Madadga zor yiqiladi. Ikkovi birgalikda halok boʻladi.

⁴Ha, Egam menga aytmoqda: “Kuchli sher qoʻyni boʻgʻizlaganda, Choʻponlar shovqin — suroniga e’tibor bermas, Ularga hatto nazar ham tashlamas. Shu singari, Men, Sarvari Olam, Sion togʻida — oʻsha tepalikda Jang qilishga kelaman.

⁵Oʻz ini ustida uchayotgan qush kabi, Men, Sarvari Olam, Quddusni qoʻriqlayman. Men Quddusni qoʻriqlab, ozod qilaman, Himoya qilib, najot beraman.”

⁶Ey Isroil xalqi! Garchi sizlar shu qadar fosiq isyonchi boʻlsangiz ham, endi Egamizga qayting!

⁷Ha, oʻsha kuni har biringiz oltin butlar va kumush tasvirlarni rad etasiz. Ularni gunohkor qoʻllaringiz bilan yasagan edingiz.

⁸Ossuriya vayron boʻladi, ammo insonning qilichidan emas. Xudoning qilichi Ossuriyaliklarni uradi. Ossuriyaliklar vahimaga tushib qochadilar. Kuchli, yosh yigitlarini qul qilib olib ketadilar.

⁹Ossuriyaning suyangan qoyasi[185] vahima ichida qochadi, Lashkarboshilari jangovar bayroqdan qoʻrqib, qochib ketadi. Ha, Egamizning alangasi Quddusda, Uning oʻchogʻi Siondadir. Egamizning kalomi shudir.