Read Uzbek Muqaddas Kitob Ishayo 32 Bible Online

Ishayo 32 - Uzbek Muqaddas Kitob bible

Ishayo 32

¹Ana, shoh solihlik bilan hukmronlik qiladi, Hukmdorlar adolat bilan boshqaradi.

²Har bir odam shamoldan asraydigan panohday boʻladi, Boʻrondan saqlaydigan boshpana kabi boʻladi. Ular sahrodagi suv oʻzaniga oʻxshaydi, Tashna yerdagi ulkan qoyaning soyasiday boʻladi.

³Koʻrib turganlar endi koʻz yumib yurmaydi, Qulogʻi borlar endi quloq soladi.

⁴Idroksizning aqli anglaydigan boʻladi, Duduq odamning tili ravon boʻladi.

⁵Ahmoqni endi aslzoda deb chaqirmaydilar, Yaramasni, hurmatga sazovor, deb aytmaydilar.

⁶Mana, ahmoq kaltafahmlik bilan gapiradi, Fikri — zikri esa yovuzlik bilan band. Qilganlari — nopoklik, Egam haqida xato gapiradi. Och odamni u ochligicha qoldiradi, Chanqaganga suv bermaydi.

⁷Battolning usullari yovuzdir, U yomonliklar rejalashtiradi, Yolgʻon gap — soʻzlari bilan Faqirning haq da’vosini yoʻqqa chiqarib, Bechorani nobud qiladi.

⁸Olijanob odamlar esa yaxshi rejalar tuzadi, Yaxshi niyat qilib, oʻz soʻzida turadi.

⁹Ey siz, begʻam ayollar, Turinglar, Menga quloq solinglar! Ey siz, oʻziga ishongan qizlar, Mening gaplarimni eshitinglar!

¹⁰Ey sizlar, beparvo yurganlar, Bir yil oʻtar — oʻtmas titray boshlaysiz. Uzum hosili yaxshi boʻlmaydi, Meva hosil bermaydi.

¹¹Qoʻrqing, ey siz, begʻam ayollar, Qaltirang, ey oʻziga ishongan qizlar! Tavba qilib, kiyimingizni yechib tashlang. Qanorga oʻranib, belingizni bogʻlang!

¹²Koʻkragingizga urib yigʻlang Ajoyib dalalaringiz, Serhosil uzumzorlaringiz uchun!

¹³Xalqimning yeri uchun yigʻlang! U yerni tikan, yantoq butalari bosib ketadi. Ha, shodlikka toʻla boʻlgan uylar uchun, Quvnoq shahar uchun aza tuting!

¹⁴Mana, saroy tashlandiq boʻlib qoldi, Gavjum shahar sahroga aylandi. Qal’ayu minora to abad Yovvoyi eshaklar yayraydigan joy, Chorva uchun yaylov boʻldi.

¹⁵Toki yuqoridan ustimizga Ruh yogʻilmaguncha shunday boʻladi. Undan keyin sahrolar serhosil dalaga aylanadi, Serhosil dala oʻrmon sifat boʻladi.

¹⁶Shunda odillik sahroda makon qiladi, Solihlik serhosil dalada maskan qiladi.

¹⁷Solihlik mevasi tinchlik boʻladi, Solihlik samarasi to abad xotirjamlik, ishonch boʻladi.

¹⁸Xalqim yashaydi sokin joylarda, Bexavotir uylarda, xotirjam maskanlarda.

¹⁹Oʻsha oʻrmonni doʻl yakson qiladi, U shahar esa tamomila yoʻq boʻladi.

²⁰Shunday boʻlsa ham, naqadar baxtlisiz! Irmoqlar boʻyida ekin ekasiz. Chorvayu podangiz yaylovlarni kezib yuradi.