Read Uzbek Muqaddas Kitob Ishayo 33 Bible Online

Ishayo 33 - Uzbek Muqaddas Kitob bible

Ishayo 33

¹Ey talanmagan talonchi! Holingga voy! Ey xiyonatni tatimagan xiyonatkor! Holingga voy! Rosa talab boʻlganingdan soʻng, Oʻzingni talon — taroj qiladilar. Xiyonatni bas qilganingda, Senga xiyonat qiladilar.

²Ey Egamiz, bizga marhamat qil, Biz Senga umid bogʻlaymiz. Bizga har kuni kuch ato qil, Kulfat chogʻi esa bizga najot ber.

³Gumburlagan ovozingdan xalqlar tarqab ketar, Sen qoʻzgʻalganingda elatlar qochib ketar.

⁴Chigirtkalar[186] yigʻilganday oʻljalaring yigʻilar, Chigirtkalar uyumi kabi, oʻljalaringni talon — taroj qilishar.

⁵Egamiz yuksalgandir. Ha, Uning maskani yuksakda. Toʻldirgandir U Quddusni[187] adolatu solihlik ila.

⁶Ey Quddus, U kunlaringiz tinchligini mahkam tutadi, Uning Oʻzi najot, ilm — ma’rifat, donolikning boy manbaidir. Egamizdan qoʻrqish sizlarning xazinangizdir.

⁷Ana qarang! Yahudoning jasur yigitlari Koʻchalarda faryod qiladi, Tinchlik elchilari[188] achchiq — achchiq yigʻlaydi.

⁸Katta yoʻllar huvullab qolgan, Bu yoʻllardan yurmaydi hech kimsa, Ahdlar buzildi, shaharlar vayron boʻldi[189], Inson oʻz qadrini yoʻqotdi.

⁹Yurt aza tutdi, azob chekdi. Lubnon oʻrmonlari isnodga qolib, qurib qoldi. Sharon tekisligi[190] sahroga oʻxshab qoldi, Bashan[191], Karmil togʻidagi daraxtlarning yaproqlari qolmadi.

¹⁰“Endi qoʻzgʻalaman, — demoqda Egamiz. — Endi Men yuksalaman, Ha, Oʻzimni baland koʻtaraman.

¹¹Sizlar esa somonga homilador boʻlganday, Foydasiz poyalar tuqqanday boʻlasiz. Ruhingiz sizlarni olov kabi yeb bitiradi.

¹²Xalqlar yonib, kul boʻladi, Kesilib, olovga tashlangan tikanday boʻladi.

¹³Ey uzoqdagilar, Mening qilganlarimni eshiting, Ey yaqindagilar, qudratimni bilib oling!”

¹⁴“Oramizda kim yamlamay yutadigan olov bilan tura oladi? Oramizdagi kim yonib bitmas alanga yonida qola oladi?” deya Quddusda gunohkorlar vahimaga tushdi, Nopoklarni qoʻrquv egallab oldi.

¹⁵Mana, qarang solih yashayotganlarga! Ular toʻgʻri gapni gapiradi, Tamagirlik foydasidan yuz oʻgiradi, Pora olishdan qoʻllarini tiyadi. Qotillarning fitnalariga qoʻshilmaydi, Koʻzlarini yovuzlik jalb qila olmaydi.

¹⁶Ha, shundaylarning maskani yuksaklarda boʻladi, Togʻlardagi qoyalar boshpanasi boʻladi. Nonu suvi hech qachon yetmay qolmaydi.

¹⁷Mana, koʻzlaringiz ulugʻvor shohni, Keng yoyilgan yurtni koʻradi.

¹⁸Shunda oʻtmishdagi qoʻrquvni eslab, deysiz: “Qani ekan oʻsha bosh lashkarboshi? Qani oʻsha oʻljalarni oʻlchagan odam? Qani endi minoralarni sanaganlar?”

¹⁹Sizlar tillarini tushunmaydigan, Gaplarini anglamaydigan, Oʻsha takabbur xalqni endi koʻrmaysiz!

²⁰Mana, qarang Quddusga! Bayramlarimiz shahriga boqing. Oʻz koʻzlaringiz bilan Sionni, Oʻsha osuda maskanni koʻrasiz. Bu chodir hech qachon koʻchmaydi, Uning qoziqlari surilmaydi, Bironta arqoni uzilmaydi.

²¹Ha, u yerda qudratli Egamiz bizning Shohimiz boʻladi, U yerda keng daryolaru irmoqlar boʻladi. Eshkakli urush kemalari kechib oʻta olmaydi, Yelkanli jang kemalari ham u yerda suza olmaydi.

²²Axir, Egamiz hukmronlik qiladi, Uning Oʻzi qonun — qoidani oʻrnatadi. Egamiz bizning Shohimizdir, Uning Oʻzi bizga najot beradi.

²³Kemangizning machtasi mustahkam emas, Uning arqonlari zaiflashgan, Uning yelkani yoyilmaydi[192]. Soʻng moʻl — koʻl oʻlja boʻlinadi, Hatto choʻloq ham oʻljaga sherik boʻladi.

²⁴Orangizda hech kimsa, “Men xastaman”, demaydi, Quddusdagilarning gunohlari kechiriladi.