Read Uzbek Muqaddas Kitob Ishayo 34 Bible Online

Ishayo 34 - Uzbek Muqaddas Kitob bible

Ishayo 34

¹Ey elatlar, yaqinroq keling, quloq soling! Ey xalqlar, diqqat qiling! Eshiting, ey zamin, zamindagi bor jonzot! Olamu uning mahsuli, eshiting!

²Ha, Egamiz butun elatlardan gʻazabda, Ularning lashkarlariga qahri keldi. Egamiz ularni tamomila qirib tashlaydi. Ularni boʻgʻizlashga hukm etgan.

³Murdalari koʻmilmay qolib ketadi, Jasadlaridan qoʻlansa hid anqiydi, Ularning qoni qirlarda daryo boʻlib oqadi.

⁴Samodagi hamma yulduzlar chirib ketadi, Osmon oʻrama qogʻozday[193] eshilib ketadi. Tokdan qurib tushgan barglar singari, Daraxtidan toʻkilgan anjir singari, Samoviy jismlar toʻkilib ketadi.

⁵Egam aytar: “Ha, samolarda Mening qilichim paydo boʻldi[194]. Mana, u Edomga[195], Men halokatga hukm qilgan xalqning boshiga tushadi.”

⁶Egamizning qilichi qonga bulgʻangan. Qoʻzilar, echkilar yogʻiga, qoniga, Qoʻchqor buyragining yogʻiga toʻygan. Ha, Bozrax shahrida[196] Egamizga qurbonlik bor, Edom yurtida katta qirgʻin boshlanadi.

⁷Yovvoyi buqalar, novvoslar, katta hoʻkizlar ham Ular bilan birga qirilib ketadi. Ularning yeri qon bilan sugʻoriladi, Tuprogʻi yogʻni shimib oladi.

⁸Ha, bu kun Egamizning qasos kunidir. Quddus[197] uchun Egamiz qasos oladigan yildir bu.

⁹Edom irmoqlari qatronga aylanadi, Tuprogʻi oltingugurtga aylanadi, Butun yurt esa alanga ichida qoladi.

¹⁰Alanga kechayu kunduz oʻchmaydi, Tutun abadiy koʻtarilaveradi. Bu yurt avlodlar osha Vayrona boʻlib qolaveradi. Hech kim uni to abad bosib oʻtmaydi.

¹¹U yer boyqushlaru kirpilarning mulki boʻladi, Ukkiyu[198] qargʻalar u yerda makon qiladi. Ha, Egamiz bu yurtni oʻlchab, Vayronayu xarobaga loyiq topdi.

¹²Bu yurtda aslzodalar yoʻq endi, U yerdan birorta shoh chiqmaydi, Barcha shahzodalari yoʻq boʻlib ketadi.

¹³Qal’alarida tikanlar oʻsadi, Saroylarida yantoqlar, qushqoʻnmas butalar bitadi. U yer chiyaboʻrilarga maskan boʻladi, Tuyaqushlarning boshpanasi boʻladi.

¹⁴Yovvoyi mushuklaru sirtlonlar Bir — biriga duch keladi, Yovvoyi echkilar bir — birini chaqirib ma’raydi, U yerda tun sharpalari dam oladi, Oʻsha yer ularga oromgoh boʻladi.

¹⁵Ilonlar[199] u yerda in qurib, tuxum qoʻyadi, Soya joylarda bolalarini yigʻadi. Quzgʻunlar u yerda juftlanib toʻplanadi.

¹⁶Mana, Egamizning kitobidan[200] topib, oʻqing: Hayvonlaru qushlardan birontasi yoʻq boʻlmaydi, Ularning hammasi juft — juft boʻladi, Egamizning Oʻzi shunday amr etgan, Uning Ruhi hammasini toʻpladi.

¹⁷Egamiz qur’a tashlab, har birining ulushini berdi, Arqon bilan oʻlchab, yurtni ularga boʻlib berdi. Bu yurt to abad ularning mulki boʻladi, Avlodlar osha ular bu yerda yashaydi.