Read Uzbek Muqaddas Kitob Ishayo 35 Bible Online

Ishayo 35 - Uzbek Muqaddas Kitob bible

Ishayo 35

¹Choʻlu biyobon shod boʻladi, Sahro quvonib, atirgulday gullaydi.

²Hamma yoqda gul — chechaklar ochiladi, Choʻl shodlanib, quvonchdan hayqiradi. Lubnonning chiroyi, Karmil togʻining, Sharon tekisligining[201] ulugʻvorligi Unga beriladi. Ular Egamizning shuhratini, Xudoyimizning ulugʻvorligini koʻradi.

³Qoʻllari charchaganlarga dalda bergin, Tizzalari bukilganlarga madad bergin.

⁴Qoʻrqoq yuraklarga shunday deb aytgin: “Dadil boʻling, qoʻrqmang! Mana, Xudoyingiz! Qasos kelmoqda ilohiy intiqom ila, Uning Oʻzi sizlarga najot beradi.”

⁵Oʻsha paytda koʻrlarning koʻzlari ochiladi, Karlarning quloqlari esa eshitadi.

⁶Choʻloq ham ohuday sakraydi, Soqov shodlikdan hayqiradi. Mana, axir, sahroda suv sharillab oqmoqda, Choʻl joylar esa irmoqlarga toʻla.

⁷Qizib yotgan qum hovuzga aylanadi, Qaqragan yer qaynayotgan buloq boʻladi. Oldin chiyaboʻrilar yashagan maskanlarda Endi maysa, qamish, papiruslar oʻsadi.

⁸Oʻsha yerdan katta yoʻl oʻtadi, Muqaddas Yoʻl deb atalgan yoʻl boʻladi. Nopoklar u yoʻlga qadam bosmaydi, Bu yoʻl mana shu yoʻldan yuradiganlarga qarashlidir. Bu yoʻldan yuradiganlar, Hatto idroksizlar ham adashmaydi[202].

⁹U yerda sher boʻlmaydi. Yirtqich hayvon yurmaydi. Ular bu yerda topilmaydi. Ha, faqat najot topganlar oʻsha yerda yuradi.

¹⁰Egamiz qutqarganlar qaytib keladi, Ular qoʻshiq aytib, Quddusga[203] kiradi. Boshlarida abadiy shodlik toji boʻladi, Shod — xurramlik ularni qamrab oladi, Qaygʻu, gʻamlar yoʻq boʻlib ketadi.