Read Uzbek Muqaddas Kitob Ishayo 38 Bible Online

Ishayo 38 - Uzbek Muqaddas Kitob bible

Ishayo 38

¹Oʻsha kunlari Hizqiyo tuzalmas xastalikka yoʻliqib, oʻlim toʻshagiga yotib qoldi. Omiz oʻgʻli Ishayo paygʻambar uning huzuriga kelib, shunday dedi: “Egamiz shunday aytmoqda: tayyorgarligingni koʻrib qoʻyaver, endi tuzalmaysan, oʻlasan.”

²Hizqiyo yuzini devorga burib, Egamizga yolvordi:

³“Ey Egam! Chin qalbimdan Senga sodiq boʻlib, yoʻllaringdan yurganimni va oldingda toʻgʻri ishlar qilganimni esla.” Shunday deb achchiq — achchiq yigʻladi.

⁴Shundan keyin Ishayoga Egamizning quyidagi soʻzi ayon boʻldi:

⁵“Borib, Hizqiyoga shunday deb ayt: «Bobong Dovudning Xudosi — Egamiz shunday aytmoqda: iltijolaringni eshitdim, koʻz yoshlaringni koʻrdim. Umringni yana oʻn besh yilga uzaytiraman.

⁶Seni va bu shaharni Ossuriya shohining qoʻlidan xalos qilaman. Ha, bu shaharni himoya qilaman.

⁷Ey Hizqiyo! Men, Egang, bergan va’damni bajaraman. Mana senga Mendan alomat:

⁸ana qara! Botayotgan quyosh Oxozning zinapoyasiga[227] soya tushirib turibdi. Oʻsha soyani oʻn qadam orqaga surdiraman.»” Shunday qilib, soya oʻn qadam orqaga ketdi.

⁹Shoh Hizqiyo sogʻaygandan keyin quyidagi she’rni yozdi:

¹⁰“Men aytdim: Nahotki hayotim choʻqqisida Oʻliklar diyoriga[228] borsam?! Umrimning qolgani xazon boʻlsa?!

¹¹Nahot, Egamni endi koʻrmasam?! Ha, Uni koʻrmasman bu yorugʻ dunyoda. Tirik zotlarni endi koʻrmayman. Bu dunyodagilar bilan boʻlmayman.

¹²Choʻponning chodiri yigʻilganiday Mening umrim uzildi, Mendan tortib olindi. Umrim toʻquvchining matosi kabi bitdi. Uning dastgohidagi ipday Mening umrim ham qirqildi. Ey Rabbiy, tunu kun meni qiynaysan.

¹³Tonggacha faryod qildim, Sherday hamma suyaklarimni sindirasan. Ey Rabbiy, tunu kun meni qiynaysan.

¹⁴Qaldirgʻochu turnaday nola chekdim, Musichaday oh — voh qildim. Yuqoriga qarayverib, koʻzlarim toldi, Ey Rabbiy, ezildim, yordam ber menga!

¹⁵Endi men nima desam ekan?! Egam menga nima aytgan boʻlsa, Uning Oʻzi oʻshani qildi. Jonim tortgan bu azoblar tufayli Umrim boʻyi itoat etib yuraman[229].

¹⁶Ey Rabbiy, Sening tarbiyang yaxshidir, Chunki u hayotu sogʻlikka yetaklaydi. Sen menga sogʻligimni qaytarding, Menga qayta hayot baxsh etding.

¹⁷Mana, hamma qiyinchiligim Yaxshilikka aylandi. Qabrdan meni saqlading[230], Hamma gunohlarimni kechirding.

¹⁸Axir, oʻliklar diyori[231] Senga shukur qilmaydi, Oʻlim Senga hamdu sano aytmaydi. Qabrga boradiganlar Sening sadoqatingdan umid qilmaydi.

¹⁹Mana, men Senga shukur aytmoqdaman. Axir, tiriklar, faqatgina tiriklar Senga shukur aytadilar — ku! Otalar oʻzlarining farzandlariga Sening sadoqatingni bildiradilar.

²⁰Egam meni qutqaradi. Butun umrimiz boʻyi torli asboblar ila Egamning uyida kuylaymiz.”

²¹Ishayo shunday degan edi: “Anjir shirasini olib, yaraning ustiga qoʻyinglar. Shunda Hizqiyo sogʻayadi.”

²²Buni eshitgan Hizqiyo: “Egamizning uyiga borishimni qanday bilaman? Buni nima isbotlaydi?” deb soʻragandi[232].