Read Uzbek Muqaddas Kitob Ishayo 40 Bible Online

Ishayo 40 - Uzbek Muqaddas Kitob bible

Ishayo 40

¹“Yupating, xalqimni yupating, — demoqda Xudoyingiz. —

²Quddusning ruhini koʻtarib, Unga shunday deb ayting: «Azob kosang toʻlib boʻldi, Ayblaring uchun jazo olib boʻlding. Hamma gunohlaring evaziga Men, Egangdan ikki karra jazo olding.»”

³Bir ovoz yangramoqda: “Choʻlda[234] Egamizga yoʻl hozirlang, Sahroda Xudoyimizga toʻgʻri yoʻl oching.

⁴Har bir jarlik yuksaladi, Har bir togʻu tepalik pasayadi. Oʻnqir — choʻnqir joylar tekis boʻladi, Oʻydim — chuqur yer tekislik boʻladi.

⁵Oʻshanda Egamizning ulugʻvorligi zohir boʻladi, Butun jonzot birgalikda buni koʻradi. Ha, Egamiz Oʻz ogʻzi bilan shuni aytdi.”

⁶Bir ovoz: “E’lon qil!” deb aytdi, Ikkinchisi: “Nimani e’lon qilaman?” deb soʻradi[235]. Birinchi ovoz shunday dedi: “Inson zotining hammasi maysaday, Ularning barcha sodiqligi dala guli kabidir.

⁷Ularning ustidan Egamizning nafasi esganda Oʻtlar quriydi, gullar soʻlib qoladi. Mana, bu xalq maysaning oʻzi.

⁸Oʻtlar quriydi, gullar soʻlib qoladi, Xudoyimizning kalomi esa abadiy turadi.”

⁹Ey xushxabar keltirgan Quddus, Baland toqqa chiq! Ey xushxabar keltirgan Sion[236], Baland ovozda e’lon qil! Qoʻrqmagin, jar solgin! Yahudo shaharlariga: “Mana sizning Xudoyingiz”, deb aytgin.

¹⁰Mana, Egamiz Rabbiy qudrat ila keladi, Qudrati ila hukmronlik qiladi. Uning Oʻzi taqdirlaydi, Mukofotini Oʻzi bilan olib kelmoqda.

¹¹Choʻpon kabi, U Oʻz suruvini boqadi, Qoʻzilarni qoʻllarida koʻtaradi. Ularni koʻtarib, bagʻriga bosadi, Qoʻzilari bilan birga ona qoʻyni Ehtiyotlab haydab boradi.

¹²Kim hovuchi ila suvlarni oʻlchagan?! Kim qarichlab osmonni oʻlchagan?! Zamin tuprogʻini oʻlchagan bormi?! Kim togʻlarni tarozida tortib koʻrgan?! Tepaliklarni tarozi pallasida tortgan?!

¹³Kim Egamizning Ruhiga[237] yoʻl koʻrsata oladi?! Kim Unga maslahat bera oladi?!

¹⁴U kimga maslahat solgan?! Kim Unga nasihat bergan?! Kim Unga adolat yoʻlini oʻrgatgan?! Unga bilim bergan bormi?! Idrok yoʻllarini Unga koʻrsatgan bormi?!

¹⁵Axir, elatlar chelakdagi bir tomchi suvdaydir, Ular tarozi pallasidagi chang kabidir. Mana, orollarni ham Egamiz changday koʻtaradi.

¹⁶Lubnon yurtidagi hayvonlar qurbonlikka ozlik qiladi, Oʻrmonlarining daraxtlari esa yetarli oʻtin boʻlmaydi.

¹⁷Jamiki elatlar Egamiz oldida hech nima emas, Egamiz nazarida ular arzimas, boʻshliqdir.

¹⁸Xoʻsh, Xudoni kimga oʻxshatasiz?! Unga qanday qiyofani berarkansiz?!

¹⁹Hunarmand yasagan butning qiyofasinimi?! Axir, usta butni oltin bilan qoplagan. Unga kumush zanjirlar yasab bergan.

²⁰Unday qilishga qurbi yetmagan esa Chirimaydigan yogʻoch topadi. Mohir ustani yollab, Yiqilib tushmaydigan but yasattiradi.

²¹Bilmaysizmi?! Eshitmaganmisiz?! Boshidan sizga aytilmaganmi?! Dunyo poydevoriga qarab ham tushunib yetmaysizmi?!

²²Xudo osmon gumbazi uzra oʻtiradi, Zamin ahli chigirtka kabidir. Xudo osmonni parda kabi yoygan, Odamzod makon qilsin deya, chodir kabi qurgan.

²³Shahzodalarni U pastga uradi, Zamin hukmdorlarini yoʻqqa chiqaradi.

²⁴Evoh, ular ekilishi bilanoq qurib qoladi. Yerga oʻtqazilishi bilanoq soʻlib qoladi. Ildiz otishi bilanoq qurib qoladi. Ha, Egamizning nafasi ularni quritadi. Boʻron ularni somonday uchirib ketadi.

²⁵“Meni kimga qiyoslaysiz? Kim Menga teng kela olar?” — deb aytadi Muqaddas Xudo.

²⁶Koʻzlaringizni osmonga tiking, qarang: Axir, bularni kim yaratgan? Xudo osmonga yulduzlarni terib qoʻygan — ku! Uning Oʻzi har biriga nom bergan — ku! Oʻzining buyuk kuchi, ulugʻ qudrati bilan Har birini oʻz joyiga chiqarmay qoʻymaydi.

²⁷Ey Yoqub nasli, nima uchun sen: “Boshimga tushganni Egamiz koʻrmaydi”, deysan? Ey Isroil xalqi, nima uchun sen: “Mashaqqatlarimni Xudoyim unutgan”, deb aytasan?

²⁸Nahotki bilmaysan? Nahotki eshitmagansan? Egamizning Oʻzi abadiy Xudo — ku! Butun olamni U yaratgan — ku! U charchamaydi, holdan toymaydi, Uning donoligini bilib boʻlmaydi.

²⁹U toliqqanga kuch beradi, Zaifning kuchiga kuch qoʻshadi.

³⁰Hatto yoshlar charchaydi, holdan toyadi, Yigitlar qoqilib, yiqiladi.

³¹Egamizdan umid qilganlar esa Yangidan kuch oladi, Burgut singari parvoz qiladi. Ular yugurib, charchamaydi, Yurib ham hech toliqmaydi.